Black Immigrant Daily News
The content originally appeared on:
DiarioCaso Avestruz
ORANJESTAD (AAN): Diaranson mainta a sigui cu tratamento di caso Avestruz caminda e sospechosonan Biemans, Abath y Sevinger a presenta dilanti Hues.
TRAHA RESTAURANT NA BUCUTI PROMER CU PERMISO TA CLA
Ta asina cu ainda Biemans ta doño di Bucuti. Hues a mustra cu na Februari 2012 a haci e promer peticion pa expansion di erfpacht. Segun Biemans, na 2011 el a haci 3 peticion y na 2012 atrobe. El a bisa cu a manda carta DIP y e di tres y di cuater carta a manda copia pa minister. 10 Juli 2012 el a manda un carta dirigi na Abath y un copia na minister.
Den e carta Biemas a gradici Abath pa e combersacion pa e ampliacion di erfpacht, cual a tuma lugar e mainta di 10 Juli 2012. Segun Biemans e tabata purba haya ampliacion di erfpacht pa Bucuti. E conoce Abath pa 35 aña y e tabata kier ampliacion di erfpecht. E tabata kier a basha e restaurant abao y kier haci inversion di 10 miyon florin den un restaurant nobo.
Segun Biemas, den mesun momento Manchebo y Costa Linda tabata den e mesun situacion cu Bucuti. 2016 Machebo a haya ampliacion di erfpacht, Costa Linda a haya na 2011. Na 2017 finalmente Bucuti a haya aprobacion di ampliacion. Tabatin contratiempo pasobra tabatin di haci midi y Cadaster a haci fayo. A sera hotel pa 5 luna y habri restaurant na 2013. Segun Biemans, nunca el a pensa cu e lo haya problema.
Hues a remarca cu Biemans a haya aprobacion na 2017 pero a construi na 2013. Biemans a bisa cu 23 Juli 2013 el a haya carta di Abath cu e por cuminsa construi numa. Hues a bisa den e carta ta bisa cu di acuerdo cu e aprobacion di minister di 16 Juli 2013, no tin problema pa ehecuta e proyecto.
Hues bisa cu tin un carta di Abath 13 Juli 2013 manda pa minister pa aproba e peticion pa expansion di tereno. Tambe el a bisa cu posiblemente lo por tin contra di parti di comision di beachnan.
Abath a splica Hues con a atende cu Manchebo promer pa haya tereno pa expande pa asina por keda cla cu e temporada halto di turismo. Mesun cos a haci cu Bucuti. Despues nan a haya e erfpacht oficial.
BIEMANS TA SPLICA PAGONAN HACI NA ABATH
Hues a mustra cu Abath lo a haya 8 pago. Tin un pago di 55 mil florin total na Maart 2012. Abath a splica cu esaki ta placa pa taxaccion pa hotel. Tin pagonan di 20 mil florin. Abath a bisa cu e no tabata sa di pagonan. El a splica cu el a haya placa di mas y kier a debolbe.
Despues Biemans a splica Hues con esaki a sosode. El a pidi Abath pa haci 2 taxaccion, un ta Bucuti y un di e cas na Malmok. El a bisa cu el a duna Abath un bonus di 20 mil florin pa su bon trabao. Hues a remarca cu esaki tabata den un mesun temporada cu a pidi pa erfpacht. Tin pago na 2013, 2014 y 2015. Segun Biemans el a haci un adelanto di pago na Abath pa e taxaccionnan. El a bisa cu na 2015, Abath no a haci taxaccion. Ta awor, relaciona cu e caso el a ripara esey. Biemans a splica cu na 2017 a manda otro pago di adelanto. Dos biaha 20 mil florin.
Na 2018 a paga 45 mil florin. Segun Biemans, Abath a reacciona cu Biemans a paga di mas. El a bisa cu e no kier e paga bek pasobra cu Abath tin mas trabao pa haci. Ta trata aki di 20 mil florin. Biemans a bisa cu na 2018, Abath a haci 3 taxaccion y e ta considera esey como pago di loke a haya di mas.
Hues a puntra Sevinger, si e tabata sa cu Abath tabata traha pa Biemans. El a bisa cu no. Hues a puntra si e ta haya cu esey lo influencia e trabao di Abath pa cu e peticion di tereno. Sevinger a bisa cu e conoce Abath como un professional cu ta haci su trabou manera e mester ta.
Fiscal a bisa cu e ta calcula 200 mil florin Abath a haya for di Biemans. Abath a splica cu taxaccion di hotel ta hopi trabao. E mester busca y paga expertonan pa yuda calcula, mashinnan y otro aspectonan di e hotel.
Biemans a bisa Hues cu e tin 52 aña biba na Aruba y ta duele masha hopi cu awor e ta hay’e den un caso aki.
A KITA LABAMENTO DI PLACA DI 2 MIYON
Fiscal a bisa Hues cu e caso di labamento di 2 Miyon Florin, e ta hala aden. Fiscal no a duna ningun splicacion mas.
SEVINGER MALVERSA
Hues a mustra cu ta acusa Sevinger di a malversa 11 mil florin di malversacion di Fundacion Curazon Berde, cu ta e fundacion di Sevinger pa cu campaña. Sevinger a bisa cu el a tuma e 11 mil florin for di e fundacion Curazon Berde cual tabata un adelanto. Sevinger a splica cu el a paga huur, awa, coriente di e fundacion y e fundacion a pag’e esakinan.
El a splica cu el a haya invitacion pa un reunion den exterior y su señora tambe a wordo invita. El a uza e placa pa bay. El a mustra cu den 2009 y 2010 el a paga cash henter aña e gastonan di huur. Un biaha so e fundacion a paga huur. El a bisa cu tin chequenan cu e fundacion a traha pero nunca a cobra esakinan.
AWE FISCAL LO EXIGI CASTIGO
Awe mainta lo bira e parti interesante caminda Fiscal lo bay presenta su pensamento di e caso y ki castigo e ta exigi pa cada un.
NewsAmericasNow.com
