Black Immigrant Daily News
The content originally appeared on:
DiarioRealidad mundial marca pa incertidumbre ya ta un peliger
*Gobierno encarga cu bon funcionamento di inversion
*Pandemia a duna prueba di exito di esfuerzonan uni
ORANJESTAD(AAN)—Ta den e situacionnan mas dificil di bida, un hende ta crece. Ta den e situacionnan mas dificil di un pais, un pais ta vence obstaculonan pa cual e no tabata prepara.
Na 2020 Aruba tabata tin un asistencia di Marina Real, pa proteha e pais contra un invasion militar. Aruba tabata tin Polis pa proteccion interno y di cada ciudadano. Aruba tabata tin e base fuerte di e economia basa riba turismo, cu naturalesa a entrega e pais.
Sinembargo, pa Aruba por a sobrevivi, tabata tin mester di algo esencial. E union di hende, di e Pueblo Arubano, cu na tur momento dificil den historia, a bira e factor determinante.
Durante henter historia di DIARIO, cu ta intimamente mara na e historia di Aruba como pais, por mira con union a bira e factor principal pa Aruba triunfa riba situacionnan cu nunca e por a idea.
Na e momentonan aki, mundo ta enfrenta retonan enorme. Mundo ta enfrenta un inseguridad enorme, cu rond mundo ta produci caranan di miserio y di horor.
Kico hende lo pone riba mesa pa e come? Con hende lo sobrevivi uno di e crisisnan economico y financiero mas pisa den historia?
Otro reto pa Arubianonan cu mester siguia nabega riba e barco Aruba, cu como capitan cu ta guia e barco pa su destino, conoce Arubianismo.
Na e momentonan aki, Aruba ta enfrenta mescos cu henter mundo, momentonan financiero sumamente dificil.
Tabata na e momentoanan cu Aruba a grita “Eureka, victoria” cu Covid-19 a deshaci di e pakete cu Aruba a prepara, pa bandona e desaster provoca pa debe nacional.
Covid-19 a menasa cu destruccion di e economia di Aruba, cu ta entrega Aruba e circulacion di placa pa medio di comercio, cu ta bira pan riba mesa pa henter comunidad.
Gobierno di Aruba a introduci e sistema pa e Florin sigui lora y a sostene e idea empresarial liber, cu ta haci cu comercio ta productor di trabou pa e trahador y asina fuente di entrada di e pais.
Aruba a permiti pa e Florin sigui lora na momento cu economia di Aruba tabata enfrenta estado di bancarota y trahadornan rond Aruba, a sigui disfruta di nan entrada.
E sistema democratico pa den un comercio liber, Florin circula y entrega entrada na Gobierno y trahadornan, a triunfa.
Despues di pandemia, Aruba kier a bolbe na normalidad. Na e momentonan cu, economia mester a bolbe crece y cu comercio y trahadornan lo a uni den progreso nobo, Guera na Ukraine a cuminsa y petroleo a basha loke a resta di mundo abou.
Mundo ta den un crisis total. Situacion di Aruba tambe a empeora y asina tanto comercio, gobierno como trahador y tur otro ciudadano cu ta depende di circulacion di Florin, ta den problema.
Pa bandona e situacion aki, Arubianismo mester bolbe haya expresion. Hunto mester sinta na mesa rondo, cu lugar pa hunto gremionan y comprende otro.
Hunto mester yega na e cadena fuerte di union, den cual Arubianismo ta presenta su mes na un mundo cu a respeta Aruba pa e forma cu e por uni pa alcansa interes nacional.
Aruba mester di placa. Pa e placa lora mester di inversion, cu mester crea e entrada necesario pa Florin lora y Pueblo ta feliz, ganando su pan di cada dia na forma honesto.
DIARIO conoce dolor di e comerciante di mas grandi te mas chikito. Ta cu e forsa financiero produci dor di actividad comercial na cual e tienda mas chikito di Aruba tambe ta aporta mescos cu e companianan grandi, gerencia y trahadornan di DIARIO por cumpli cu nan deber periodistico enfrente Aruba, un pais unico.
Aruba mester sigui dilanti cu un situacion financiero di Gobierno cu hunto mester soluciona pero tambe un economia basa riba e inversion di comercio liber pa garantisa pa Florin lora y pan subi mesa di tur hende.
Nos ta sigur cu Gobierno, Comercio, Sindicatonan, henter Pueblo di Aruba por bolbe uni den solucion di entrada pa e pais na un forma cu ta garantisa cu Florin por sigui sostene un economia, den cual felicidad di Aruba ta hancra!
NewsAmericasNow.com
