Parlamentario Shailiny Tromp contento cu deporte por habri porta pa atletanan cuminsa forma nan fundeshi profesional
Black Immigrant Daily News
ORANJESTAD (AAN): Durante e conferencia di prensa di siman pasa diahuebs di Gabinete Wever-Croes,
Minister di Deporte a duna un splicacion amplio con e Premio Excelencia den Deporte ta hinca den otro, cuanto nominado tin, kico e criterianan ta stipula e ganadonan, kico lo ta e premionan, a trata e hecho cu a agrega team sport como categoria y a informa ki dia e actividadnan lo ta.
En total tin 141 nominado, pa aña 2019. Diesseis Federacion a nomina 66 deportista y pa aña 2021 18 Federacion a nomina 75 deportista. Door di pandemia no por a organiza Premio Excelencia den Deporte na 2020 y 2021. E criterionan stipula ta e prestacion local, internacional y den comunidad di e deportista.
En total lo bay otorga 141 medaya y certificado, lo duna 22 plakkaat na e ganadornan y tambe un biaha mas lo rindi homenahe na baluartenen deportivo y lo tin alavez premionan efectivo. E aña aki lo reconoce 10 baluarte deportivo. Ta di spera cu e reconocementonan y Premio Excelencia den Deporte por forma estimulo pa nos mucha y hobennan cu ainda no ta practica un deporte.
Durante e rueda di prensa a toca mi e oportunidad sorpresa pa dirigi algun palabra y durante esaki mi a subraya e hecho cu deporte por habri porta pa hopi di nos deportistanan por cuminsa forma nan fundeshi profesional. Mas y mas nos ta scucha di hobennan cu ta haya scholarship pa por sigui studia en combinacion cu nan deporte preferi. Esakinan sigur ta oportunidad valioso y sumamente importante.
Pesey mes mi a enfatisa cerca nos deportistanan pa sigui haci nan best, sigui mustra disciplina y determinacion, pasobra e por habri portanan grandi pa nan.
Durante e actividad mi a papia cu entre otro e hobennan Dyrenson Wouters y Ilajay Tromp. Ambos ta deportistanan cu mi conoce di tempo nan ta chikito y ta hobennan hopi disciplina, talentoso y cu ta stima nan deporte.
Dyrenson a haya e oportunidad mediante baseball pa bay studia na Merca y dentro di poco e lo ta biahando pa sigui su estudio na Southern New Hampshire University y alavez traha riba su carera deportivo. Dyrenson ta un hoben cu di tempo cu e tabata chikito mi gosa wak e hunga bala. Bo ta letterlijk wak cu e ta gosa di e wega y semper ta un persona positivo y cu animo. Mas cu claro mi a desea Dyrenson un bon biahe y hopi exito. Mi ta convenci cu e lo logra.
E otro hoben ta Ilajay Tromp, un deportista femenino cu despues di a hunga baseball pa hopi tempo, dado momento mester a switch pa softball. Un hoben tambe cu desde cu e tabata chikito mi tabata gosa wak e hunga meymey e mucha hombernan. Un hoben cu a start cu camp y team pa motiva otro mucha muher hunga y practica e deporte di softball. Un hoben cu actualmente ta explorando e posibilidadnan pa haya un scholarship pa bay sigui studia en combinacion cu softball. Mi a desea Ilajay tambe tur clase di exito y mi ta spera di curason cu e lo logra su soño den un futuro hopi cercano.
Por ultimo mi kier indica cu nos tin hopi deportistanan talentoso y yen di deseo pa sigui desaroya y crece den nan deporte. Hobennan cu ta dedica na nan deporte y cu ta mira posibilidadnan amplio via nan deporte. Un di e hobennan aki ta e mucha homber Beijde di 13 aña cu mi a cera conoci cu ne y su tata. E ta practica atletismo ya pa 8 aña y ta un talento creciente. Sigur tabata un placer di por a combersa cu ne durante e actividad.
https://diario.aw/categories/noticia/general/parlamentario-shailiny-tromp-contento-cu-deporte-por-habri-porta-pa-atletanan-cuminsa-forma-nan-fundeshi-profesional#sigProIda7fbc4fd70
NewsAmericasNow.com
