Caso contra Benny den Corte y 1.6 Biyon den nubia
Black Immigrant Daily News
Luz nobo ta cay riba e rapport excepcional den historia di Aruba
*Pa ”Bo Aruba” di Mike y Benny no tabatin discusion di tereno?
*Pueblo ta paga pa loke ni Parlamento ni Reino por a controla
ORANJESTAD (AAN) — Manera nos a trece dilanti den nos ultimo edicion, dia 5 di September, Corte di Husticia na Aruba lo cuminsa atende cu e caso penal contra Benny Sevinger pa supuesto iregularidad den otorgamento di tereno tempo cu e tabata Ministro den Gabinetenan di Mike Eman, cu no sa nada di e asunto y hasta a percura pa Benny Sevinger ta Miembro di Parlamento ora e aparece dilanti Mesa Berde.
E caso contra Benny Sevinger sigur ta spectacular debi na e inmensidad di acusadonan y tambe e cantidad di acusacionnan y caranan conoci den comunidad y den hopi caso e circulo mas cerca di e partido berde.
Huez mester haci su trabou y dicidi si Benny ta inocente of culpabel. Nos mester haci nos trabou y tene Pueblo informa di asuntonan cu merece tur atencion di Pueblo.
Ora papia di Benny Sevinger y tereno, nos mester papia di tur tereno y sigur di tereno cu mester a wordo cumpra pa por a realisa e proyectonan di “Bo Aruba” cu ta forma un exclusividad den nos mundo democratico.
Pa atende cu e rapport aki, mester busca na prome lugar naturalmente e gobernantenan, cu na nomber di Pueblo, a dicidi riba e proyectonan cu ni Parlamento di Aruba ni Gobierno di Reino, ni supervision por atende, pasobra simplemente e fraccion di AVP di e prome tempo di estadia di Mike Eman den Gobierno, a entrega Gobierno su bendicion y un 1.6 Biyon di Aruba.
E dos gobernantenan cu na nomber di Pueblo di Aruba a haya 1.6 Biyon na nan disposicion, ta Mike Eman y Benny Sevinger.
E resultado di e proyectonan “Bo Aruba” ta poco doloroso pa Pueblo di Aruba, cu awor mester paga tur e proyectonan di Cinco Strea pa cual mester a cumpra entre otro tereno.
Si den e terenonan cu Benny Sevinger segun acusacion di Ministerio Publico, Mike no sa nada, den e rapport ta wordo menciona con Mike tambe tabata bay bishita “Pueblo” y na su regreso di bishita na Pueblo, tabata haci cambio den e proyecto.
Na cierto momento, e tribunal di casonan administrativo cu ta Algemene Rekenkamer Aruba, a dicidi di bay traha un rapport riba e fiesta cu placa di Pueblo durante dos periodo di Gobernacion di Mike Eman den cual Benny Sevinger tambe tabata Ministro.
Benny Sevinger como Ministro na 2017 mester a pone su comentario pero a sconde e rapport den su lachi.
Despues di eleccion e rapport a mira luz di dia hunto cu tur informacion kico a pasa cu e fondo di 1.6 Biyon di Pueblo cu a wordo comanda dor di Mike y Benny.
Den e caso aki pues, Mike y Benny tabata discuti asuntonan cu otro y probablemente a papia di terenonan tambe cu tabata tin mester pa e proyectonan.
Pero e terenonan di e Rapport Bo Aruba ta teritorio cu Mike Eman conoce y no e otro terenonan mara na e acusacion penal contra Benny Sevinger.
E placa cu a wordo gasta directamente den e proyectonan, ta uno di e motibonan cu Pueblo di Aruba mester paga mas belasting. Pero, manera Mike mes ta splica, esaki ta un inversion di Pueblo di Aruba cu por gosa di trafico pega na rotonde, baño gratis den fontein como recuerdo di e esfuersonan grandi di Mike y Benny.
Placa a lora den e proyectonan, pero si placa no lora, ta kico ta lora?
E rapport di 1.6 Biyon a desaparece for di atencion. Pueblo ta paga boca cera y ningun grupo di interes ta protesta.
Interesante ta con Mike Eman ta protesta contra e forma cu Gobierno ta gasta placa sin splica cuanto placa Pueblo pa medio di Gobierno mester paga pa loke Mike y Benny a laga atras.
NewsAmericasNow.com
