Black Immigrant Daily News

A.T.A. su inversionnan y esfuerzonan grandi ta duna fruto

ORANJESTAD (AAN): Desde 1997 Aruba ta presente den e mercado di Reino Uni. Mientras historicamente Hulanda semper tabata e mercado principal di Aruba na Europa, den e ultimo añanan prome cu pandemia, Reino Uni a bira e di dos mercado mas grandi pa Aruba den Europa.  

            Cu trabao duro, den colaboracion cu Ministerio di turismo, AAA, y AHATA a haci di e mercado aki e di dos mas fuerte na Europa. For di basta aña a bin ta traha tambe riba un conexion directo for di Reino Uni pa Aruba, banda di e opcion pa bishita cu TUI UK of cu KLM. Hopi factor a influencia e proceso y na e momento aki, despues di 7 aña nos ta hopi satisfecho di por anuncia cu Aruba ta e prome destino di Caribe Hulandes cu a logra yega na un acuerdo cu British Airways unda Aruba lo ta ricibiendo su vuelo inaugural cu e aerolinea aki den 2023.

            Na 2019, 12% di bishitantenan di Europa a bin for di Reino Uni. Durante e prome 6 lunanan di 2022 por wak cu 11% di bishitante di Europa a bin for di Reino Uni. Esaki ta demostra un recuperacion sano. Cu e vuelo directo den 2023 ta premira cu e mercado aki lo por crece mas, algo cu ta parti di A.T.A. su strategia di diversificacion.

            Si bay bek den historia; na 1997 Aruba a ricibi 2,679 bishitante di Reino Uni, cu ta 5% di bishitante for di Europa e aña ey.

            Den transcurso di añanan e cifra aki a keda subi te cu 14,502 na 2010, 19% di e total di bishitantenan for di Europa. Despues di algun aña di fluctuacion, na 2017, a yega na e cantidad record di 19,201 bishitante, 21% di e total di bishitante for di Europa e aña ey.

            Por spera cu e mercado aki lo por yega alrededor di 15,000 bishitante den 2023, yegando asina na un crecemento di 38% den comparacion cu 2019 y mustrando un recuperacion di 78% compara cu 2017, cual tabata e aña record.

            Por wak cu tanto di e mercado Europeo como di e mercado especifico di Reino Uni, mas cu 60% di bishitante ta cay den categoria di Gen Z, Millenials y Gen X (e 3 categorianan ta entre 9 y 56 aña), pues esaki ta categorianan cu por sigui crece den e añanan cu ta bin.

            Aruba tin representacion ya pa mas di 20 aña den e mercadonan di Reino Uni y a haci diferente campaña y esfuerzo pa asina operadornan y consumidornan considera Aruba.

            Algun ehempel ta campañanan cu socionan manera Barrhead Travel, Expedia, Kuoni, Caribbean Hotels, TUI UK y KLM, campañanan na diferente stacion di radio riba nivel nacional, mercadeo digital ‘Press trips’ cu publicacionnan clave mane “The Daily Mail”, “The Times”, “The Telegraph”, “Food & Travel” y “Travel Weekly” y ‘Fam trips’ pa agentenan y operadornan clave pa Aruba. Den transcurso di añanan a haci tambe anuncionan publicitario por ehempel ora cubri taxinan cu branding di Aruba como tambe ‘billboards’ grandi den e sistema di Metro London Underground, campañanan cu Sunglasses Hut y Samsonite den centronan comercial na Reino Uni.

            Tambe a haci un campaña cu ‘Wilson tennis rackets’ pa promove Aruba beach tennis. A promove e campaña na e stand di Wilson na Wimbledon. 

            Aruba ta presente tur aña na diferente bolsa importante mane WTM, ITB, Unite Caribbean y Caribbean Showcase pa asina por tin contacto cu diferente socio cu ta bende Aruba. Mester menciona tambe cu e representante di A.T.A. na Reino Uni ta miembro di e hunta di directiva di CTO UK.

            E vuelonan cu British Airways lo duna Aruba e oportunidad pa traha tambe hunto cu British Airways Holidays, yegando di e forma ey na operadornan, socionan y clientenan nobo cu antes no tabata bende Aruba.

            Mirando e responsabilidad di A.T.A. pa sigui diversifica nos mercado y atrae bishitantenan nobo cu tin e poder di compra pa contribui na nos economia, A.T.A. ta sigui inverti den e mercado aki, trahando di cerca cu British Airways entre otro, como tambe TUI UK, KLM y otro socionan na Aruba y den e mercado.

            Hecho ta cu, e logro historico aki ta resultado di colaboracionnan estrecho y tambe inversionann grandi di parti A.T.A. pa medio di su presupuesto di mercadeo pa Europa y pa medio di fondo dirigi riba atraccion y mantencion di asientonan aereo pa Aruba. Esaki ta un parti grandi di e exito di Aruba.

            Awor cu e contrato ta finalisa y e ruta ta confirma e trabao mes ta bay cuminsa y e ekipo di A.T.A. tanto na Aruba, na Europa y específicamente na Reino Uni ta cla pa e reto nobo aki. Aruba, pabien!

NewsAmericasNow.com

Black Immigrant Daily News

E plan di Venezuela pa competi cu islanan ABC…

ORANJESTAD (AAN): El a wordo anuncia como un plan grandi pa haci e isla bira un atraccion turistico di clase mundial.  Un forma cu Gobierno di Nicolas Maduro kier pa atrae inversionista stranhero, pa crea un otro isla turistico pa asina competi directamente cu e islanan ABC.  La Tortuga ta situa apenas 330 km Oost-Zuidoost di Bonaire.

   E tin beach blanco, awa blauw, un diversidad di 24 specie di parha, un refugio pa tortuganan marino, y esey ta djis algun di e tributonan di e isla La Tortuga, net dilanti costa di Venezuela den Lama Caribe.  E ta un teritorio casi virgen, unda awor Gobierno kier trata di lanta un desaroyo turistico pa atrae inversion stranhero.

   “E proyecto virgen, ecologico, mas importante di mundo henter ta aki den Caribe Venezolano,” ta loke president Nicolas Maduro a anuncia ora el a presenta e proyecto na final di Juli, di cual DIARIO a raporta esey tambe.

   Pero pa bay construi 10 hotel di luho, cancha di golf, Aeropuerto, y un Waf di Crusero riba e teritorio aki cu ta 25 kilometer largo y 10 km hancho, no at wordo mira bon pa expertonan, segun e agencia Voice of America a laga sa.

   “Mientras mas grandi e bira, mientras mas vuelo e haya, mientras mas complica e Aeropuerto bira, mas daño e ta bay haci y esaki ta afecta e factibilidad,” ta loke Joaquin Benitez ta adverti.  E ta director di Sostenibilidad di Universidad Catolica Andres Bello na Caracas.

   Pesey mes e organizacion ecologico ‘Fundacion La Tortuga’ ta totalmente contra e plan aki.  “Si e ecosistemanan marino mas importante y cu ta protegi internacionalmente, tur cos bo ta haya na isla di La Tortuga.  E ta un lugar unda cualkier intervencion cu bo haci, ta afecta e ecosistemanan aki cu ta basico,” ta loke e biologo Juan Pedro Ruiz a bisa, kende ta vice-president di e Fundacion.

   E plan di Gobierno ta pa desaroya e isla cu Parke di Molina y Parke Solar.  Actualmente e isla no tin ni coriente ni awa potable, cu ta nifica un reto di ingenieria pa reduci e impacto ambiental pa por duna e servicionan ey.

   “No ta cuestion di instala un megatuberia y manda awa for di costa te na e isla, y kere cu ya tur cos ta cla y a resolve problema di awa.  No.  Pasobra mas awa cu yega na e isla, ta mas tin di trata esaki, y esey ta un operacion complica,” Benitez a splica.

   Otro preocupacion ta e construccion di un Waf pa Crusero cu por destrui e awanan cristalino, y di un pista di aterizahe.

   “Aki e suelo ta di calki, resto di formacion di coral cu a subi riba lama, cu suelo poroso cu tin un dinamico di infiltracion hopi delicado, y cu ta hopi duro pa kibra.  Na e parti zuid di e isla tin algun laguna, laguna cu mangel, algun lugar hopi bunita, cu por wordo afecta ora cu bay kibra nan pa haya acceso.  Nan sa cu tin un fauna importante asocia cu e costa, tin tortuganan marino cu ta traha nan neishi riba e beachnan,” e experto a bisa.

   Pa atrae no djis e bishitantenan, sino tambe empleadonan pa e Hotelnan, ta pone e organizacionnan cu ta defende medio ambiente haci e pregunta: “Con lo bay maneha tur sushedad solido?”

   E gruponan ecologico a corda, cu Gobierno Chavista a ofrece 15 aña pasa un proyecto similar caba na La Tortuga cu hamas a wordo ehecuta, y pesey nan tin miedo cu e trabaonan lo cuminza, pero despues ta wordo bandona y ruina mahos lo keda eyriba.

NewsAmericasNow.com

Black Immigrant Daily News

NewsAmericasNow.com