Black Immigrant Daily News
The content originally appeared on:
DiarioORANJESTAD (AAN): Diasabra anochi pa 9:45 pm, e chauffeur di un Mitsubishi Lancer color blauw-scur
cu number A-18711 coriendo rumbo pariba riba caminda di Paradera pa Babijn, na altura di Bloemond a perde control riba su stuur, baha banda drechi di caminda y ranca full un palo di luz di voltahe halto cu tin entre Bloemond 15 y Bloemond 17. Despues di a kibra e palo den dos, e auto a bolter y keda di banda dilanti Bloemond 17. Posiblemente e chauffeur a bay desvia pa evita di dal un cacho cu a cruza caya.
Testigonan a bisa cu vlam blauw cla a ilumina henter e cielo y e area, y inmediatamente coriente a bay tur rond di eynan.
Pero debi na e corto circuito den cadena, no ta e area chikito ey so a perde coriente, sino area di Babijn, Tamarijn, Paradera, Jaburibari, Roncado, Papaya, Nuñe, Shiribana, Tanki Leendert, Modanza, Purun, Sero Patrishi, y Catiri tambe a keda scur.
Varios establecimento den area di Shiribana y Tanki Leendert cu ta keda habri te laat, mester a djis cera nan porta, pues e tabata un perdida pa comercio tambe.
Polis a yega na e lugar di accident y mesora a pone NV Elmar na altura. E dos hobennan den e auto a sali ileso di e accident, aunke kizas Diadomingo mainta nan curpa lo lanta hopi stijf.
Tecniconan di e compania NV Elmar a revisa e daño, y a nota cu tin waya gespat tur lugar rond di e area. Despues a cuminza isola e area pa asina duna coriente bek na e zonanan cu ta mas leu. El a dura como 85 minuut. Pa alrededor di 11:10 pm, e areanan mas leu a haya coriente bek.
Pero na Bloemond, mester a start e proceso pa cambia full e palo di luz. Esey ta encera cu tin di kita esun kibra, pone un palo nobo, instala tur isolator riba dje, hisa e wayanan bek na halto, conecta tambe waya di sosten na un schoorpaal, y despues tin di keur full e instalacion. Despues cu esey a keda cla, porfin pa 2:50 am e area di Bloemond tambe a haya coriente bek. Personal di Setar Cable Services na final tambe mester a hisa y pone wayanan di CableTV na e palo di luz.
Tabatin algun habitante cu a keda completamente agradeci na e trahadornan di NV Elmar cu a haya ta traha overtime pa fix e situacion. Pero toch disgusta cu a keda mas di 5 ora sin coriente, y nan ta pensa cu si acaso e Aseguro di e chauffeur di Auto ey lo ta bay paga gasto pa nan molester di anochi y marduga tambe.
Riba e potret por mira e area awor bek cu un palo di luz full nobo instala.
NewsAmericasNow.com
