Black Immigrant Daily News
The content originally appeared on:
DiarioUn pionero ta entrega un ehempel di e dignidad di trabou
*Coconut Inn y e secreto di mundo empresarial di Aruba
*Homenahe di Gobierno na momento crucial pa economia
ORANJESTAD(AAN)- Gabinete Evelyn Wever-Croes a duna un contenido special na e celebracion di Dia di Turismo 2022.
Ya pa basta dia DIARIO ta trece dilanti, cu e temporada di turismo 2022 pa 2023, lo exigi esfuerzonan grandi pa Aruba, sigur riba tereno di turismo, e alma economico di Aruba den un tempo di problemanan mundial serio.
Cu problema no ta algo desconoci pa Aruba, a keda historicamente proba cu testimonionan di personanan manera señor Angel Rojer, cu conoce e necesidad di determinacion pa sigui cana y no permiti nada bira estorbo.
Na caminda pa un futuro nobo, Prome Ministro Wever-Croes a presenta na Aruba un persona cu a entrega su bida na superacion di e lucha na cual tur hende cu kier progresa na forma honesto, mester entrega nan mes.
Ora papia di Angel Rojer, ta papia di un trahador incansabel cu a uza trabou pa e por a logra loke el a logra.
Un persona cu ta inspira cu su solo presencia y no mester di adorno ni palabra pa demanda respet, pero tambe confiansa.
E proyecto Coconut Inn, ta mucho mas cu un empresa turistico, E ta simbolisa e persona di Angel Rojer y e Pueblo di Aruba.
Coconut Inn ta un les pa tur hende cu tin e honor di conoce Angel Rojer, kende cu e sosten enorme di su señora esposa, Maria Rojer, a hiba un lucha cu a bira un logro grandi.
Angel Rojer ta un trahador incansabel.
E proyecto Coconut Inn ta simbolo di un ciudadano, cu a enfrenta bida cu tur reto di un cabez di famia y a bira un tata, esposo, cuidadano ehemplar.
No ta e hecho cu señor Angel Rojer a logra construi y sigui edifica Coconut Inn ta haci su persona, un ehempel pa e generacionnan nobo di Aruba.
Mas bien por mira den realisacion di Coconut Inn, e persona incansabel, determina pa alcansa su propositonan na un forma limpi.
Cu fe den Dios, Angel Rojer a cana den bida pa despues di Lago, dedica su mes na su “apartmentnan”, manera e tabata cualifica e proyecto cu a nace y crece na su man.
Di momento cu solo sali te pasa anochi, Angel Rojer tabata entrega su mes na su proyecto sin perde atencion pa su responsabilidad como cabez di famia y su pais.
Ora papia di Angel Rojer ta papia di un visionero, cu a kere den realisacion di un proyecto cu a crece hunto cu e demanda grandi di Aruba pa acomodacion alternativo pa e turista cu ta base economico di Aruba.
Den tempo cu ainda turismo mundialmente mester a haya reconocemento como instrumento pa activa y reactiva economia, Angel Rojer a introduci su apartamentonan.
Cu e homenahe na Angel Rojer, Prome Ministro Evelyn Wever-Croes a entrega sigur e hobennan di Aruba, un motibo y un ehempel pa nan acepta e reto cu ta spera nan generacion den un mundo den necesidad grandi pa reactivacion economico.
Pero tambe Aruba a ricibi e prueba, cu pa hende logra , hende mester ta dispuesto pa traha y pa nunca bandona nan ideal y nan obhetivanan.
Awe nos ta yama pabien na un ciudadano cu vision. Na un pionero cu a entrega mundo e prueba cu Aruba ta sobrebibi tur reto di bida y di tempo.
Den Coconut Inn por descubri, e secreto di exito di empresarionan Arubano cu for di nada a crea proyectonan cu a carga Aruba pa futuro.
Den Coconut Inn, un gran ciudadano señor Angel Rojer, ta entrega Aruba y mundo un mensahe di animo, di positivismo, curashi, fe y triunfo di trabou.
Na un momento clave pa historia mundial, e Arubiano Angel Rojer ta entrega mundo e exito di Coconut Inn, e seyo di Arubianismo!
NewsAmericasNow.com
