Den persecusion intencionalmente un auto a bay dal den patruya di Polis
Black Immigrant Daily News
Cosnan a escala na The Venue
ORANJESTAD (AAN): Diasabra marduga pa 12:30 am, un unidad di Polis di Playa a ser manda na e club nocturno di ‘The Venue’ den Weststraat pasobra eynan lo tin un pelea andando. A haya informacion cu un bouncer lo a ricibi un boter den cabez.
Ora cu Polis a yega eynan, nan a wordo dirigi door di bouncernan di The Venue, pa e parkinglot cu tin patras di e negoshi, y asina wordo poni na altura cu e problema ainda ta andando.
Un persona diripiente a grita den nan direccion, cu e agresor a bay for di e parkinglot y e ta bisti cu un T-Shirt color berde. E parkinglot aki ta riba Werfstraat.
Ora cu Polis a bay check riba Werfstraat, nan no a topa cu e bringadornan. Un poco despues Polis a tende cu un otro unidad, ta persiguiendo un auto cu a sali cu velocidad halto for di Werfstraat. Parce cu e bringadornan ta den esaki.
Polisnan tambe a subi Lloyd G. Smith Boulevard direccion pabao, y na e T-weg cu Werfstraat nan a mira un auto color cora ta sali coriendo roekeloos for di e caya. E chauffeur aki a core subi bay direccion pariba, y despues bira na man robez pa drenta Weststraat y bay panort.
E unidad di Polis a bay tras di e auto y a pone zwaailicht y sirena. E auto a drenta Emanstraat, y despues drenta Visstraat y a bira bay pariba den direccion verboden riba Ranchostraat. Ora cu el a yega mas pariba banda di Kowloon, e chauffeur a stop. Diripiente el a dal un birada bay man drechi, y dal contra un unidad di Polis cu net ta bin di zuid eynan, cu zwaailicht y sirena.
Despues di e dalmento, e chauffeur di e auto cora a baha. Polis tambe a baha mesora, y a ordena e homber aki cu color di cuero blanco y lomba sunu, pa e drumi na suela y no move.
E pasahero sinta banda di dje, cu color di cuero blanco, tambe lomba sunu, tabatin un T-Shirt berde den su man. Polis a sake di e auto pa asina detene.
Riba e asiento patras tabatin un muher sinta. Polis na varios ocasion a dune ordo pa e baha di e auto y pa e keda un tiki leu di e area. Pero el a keda bati boca cu Polisnan, y intencionalmente no a cumpli cu ordo cu agentenan ta dune. Finalmente Polisnan a fada di dje, y e tambe a wordo deteni.
Polis a pone oficialnan di Recherche, oficialnan forensico di BFTO, y Central di Polis na altura di loke a socede. Un investigacion profundo a cuminza pa check kico realmente a socede.
NewsAmericasNow.com
