Ronchi de Cuba ta un ehempel di empresario moderno
Black Immigrant Daily News
El a cumpli cu e exigencianan pa por a alcansa su logro
*Su personalidad y talentonan a keda bibo den su “Trash”
*Como capitan di industria e ta entrega Aruba un Cas di Moda
ORANJESTAD(AAN)- E pasion di Ronchi de Cuba pa mundo di alta moda, semper tabata presente.
Na edad hoben, Ronchi tabata semper impresiona na su forma, cu su presentacion personal.
Nunca el a entrega su personalidad propio, pero a uza e esencia di Ronchi pa crea un compania cu el a yama Trash, un nomber cu na prome momento ta causa shock.
“Trash” (desperdicio) den man di Ronchi de Cuba, a bira e etiketa di coleccionnan di moda unico cu Ronchi de Cuba ta ofrece na e Arubiano.
Aruba a haya un Cas di Moda, cu tin tur motibo pa competi contra marcanan stranhero, cu ta haci e Arubiano subi avion pa bay gasta nan placa den exterior.
E arte di creacion di costura, a sirbi como un fuente di entrada pa e Arubano atrabez di historia.
Companianan di tela y loke costura ta exigi, ta conoci cu profesionalnan Arubano capaz di produci e resultadonan mas bunita pa ocasionnan special.
Cu tempo, Arubianonan a cuminsa biaha pa exterior pa cumpra nan paña na paisnan manera Merca, Venezuela y Hulanda. E grupo cu mas entrada por a cumpra obranan di modistanan internacional.
E segundo parti di Siglo 20 a introduci na mundo e fascinacion pa “marca” y hasta falsificacion di marca pa productonan mas barata cu e articulonan original costoso.
Ronchi a entrega mundo di moda local y internacional un marca. “Trash” el a yama e marca di su linea di produccion di na un nivel sumamente halto internacional.
Pero den “Trash” ta mira Ronchi de Cuba y ta mira e Arubiano, mescos cu e cartera di e Arubiano cu ta haya oportunidad di briya riba plataforma mundial y internacional.
Pa Ronchi de Cuba por a alcansa su proposito, e mester a uza su talento pero tambe su determinacion pa e yega na su meta.
Nunca el a entrega su propio identidad y mescos cu el a shock cu e palabra “Trash”, e ta shock cu su presentacionnan den cual ta duna cada persona oportunidad pa expresa nan personalidad y logra nan representacion na e occasion y momento den nan bida.
“Marca” ta exigencia den e mundo nobo y ta “Marca” Ronchi de Cuba a entrega Aruba cu colecionnan den ambientenan cu a hiba e Arubiano na Aruba mes, te e cumbrenan di mundo internacional di moda, cu tanto ta atrae hende.
E hoben Ronchi de Cuba, a lucha y traha pa loke el a kere aden y awe ta haci posibel pa ora gobernante di Aruba bay exterior, Aruba wordo representa cu clase, cu e estilo cu ta duna prueba di e nivel di comunidad di Aruba.
Cu cada diseño di “Trash”, prueba ta wordo duna na mundo di e calidad di bida di Aruba y e exigencianan y gusto halto di e Pueblo di Aruba.
Awe DIARIO ta presenta Ronchi de Cuba como un Capitan di Industria na Aruba pero tambe e prueba di loke tanto biaha a wordo bisa.
Ronchi de Cuba a uza e talentonan di tanto Arubiano cu a crea nan entrada cu e fishi di modista. El a empaketa e fishi na e exigencianan di tempo moderno di un mundo cu a bira internacional y el a traha.
Trabou ta central den bida di un empresario mescos cu tur cu kier logra.
Awe como empresario Ronchi de Cuba ta entrega Aruba loke ta uno di e pasionnan mas grandi di e Arubiano, cu ta e forma cu e ta presenta su mes.
E Arubiano ya no mester biaha pa Paris, pa goza di coleccionnan na nivel haltisimo di Trash cu cartera di un Arubiano ta soporta.
Na caminda pa 2023, nos ta presenta e hoben Ronchi di Cuba cu a comberti su talentonan den un Cas di Moda, cu por competi contra e modistanan mas renombra na mundo.
Ronchi de Cuba a crece den un Aruba cu a conoce reto tras di reto for di e momento cu el a lanza “Trash” cu awe ta un invitacion pa hobennan pa subi caminda pa futuro.
NewsAmericasNow.com
