A firma un MoU entre Gobierno y United Farmers Aruba

Black Immigrant Daily News

Gobierno y sector priva a uni pa trece mehoracion

ORANJESTAD (AAN):   Diabierna mainta a tuma lugar e firmamento di un MoU entre Gobierno di Aruba y United Farmers Aruba. Esaki ta pa formaliza e cooperacion y intercambio di informacion combina cu estudionan en conhunto, pa desaroyo di mas proyectonan piloto y concentra ariba posibel solucion nan pa mehoracion di e Sector Agricola y di Criansa.

            Esaki a tuma lugar na Cunucu di Chabelito den presencia di Minister Ursell Arends, Minister Geoffrey Wever, Directora di Santa Rosa, Nathalie Maduro, Gregory Fung-a-Fat (Presidente di UFA), parlamentarionan Molina, Yarzagaray y Kamperveen.

            Sra. Maduro a expresa cu esaki tabata un mainta hopi importante pa Santa Rosa y ta un logro mas pa locual ta sector primario y pa trece union entre e cunukeronan y gobierno.

            Minister Arends a duna di conoce cu e firmamento di e MoU aki ta pa mehora y fortifica e desaroyo y cooperacion entre gobierno y sector priva.

            E meta di gobierno pa 2025 ta pa logra un total di 15% pa loke ta trata seguridad alimenticio y pa 2030 un total di 25%. Aruba ta depende grandemente di loke ta importacion y esaki tambe ta trece su efectonan, e mandatario a remarca.

            El a sigui bisa cu trahando hunto entre gobierno y sector priva lo por yuda organisa esaki pa haci agricultura algo sostenibel na Aruba.

            El a gradici Minister Wever y su departamentonan cu ta yuda pa fortifica agricultura y sector primario na Aruba. Tambe el a gradici Sr. Fung-A-Fat di UFA cu e disponibilidad pa haci intercambio di datonan, locual ta importante pa Santa Rosa por sigui yuda desaroya e sector agricultor, pero e sector primario den su totalidad.

            Finalmente, el a gradici Santa Rosa pa nan sosten pa cu e sector aki.

NewsAmericasNow.com