Minister Dangui Oduber contento cu introduccion di mas vuelonan pa Aruba for di Colombia

Black Immigrant Daily News

ORANJESTAD (AAN): Minister di Turismo ta contento di por anuncia cu diamars e aerolinea Wingo a haci lansamento oficial di nan servicio directo nobo pa Medellin.

Wingo ya caba tin un par di aña operando na Aruba cu servicio directo for di Bogota.

            Wingo ta bay cuminsa e servicio directo pa Medellin 2 biaha pa siman, esaki adicionalmente di e servicio directo existente di Bogota. E vuelonan nobo pa Medellin lo ta riba tur diaranson y diasabra. Wingo ta un aerolinea hopi economico y ta haci uzo di un avion jet Boeing 737-700.

            E servicio adicional aki ta demostra e confiansa cu e aerolinea tin den Aruba como destinacion. E ta cuadra cu e maneho cu Ministerio di Turismo ta hiba caminda ta purba di diversifica rutanan den Colombia.

            E servicio aki ta nifica un aumento tambe den e capacidad maximo di asiento den Colombia.

Actualmente tin varios destinacion den Colombia y tin 3 aerolinea cu servicio directo di y pa Colombia.      Finalmente Minister Oduber kier a felicita e Airlift Committee pa e tremendo trabou cu nan a bin ta haciendo.

            Di e forma aki ta sigui traha pa nos solamente recupera nos turismo pero percura pa tin un turismo diversifica y resiliente. “Un danki sigur na tur nos partnernan den turismo pa e esfuerzonan en conhunto”, e mandatario a expresa.

NewsAmericasNow.com