Minister Dangui Oduber a presenta proyecto di embeyecimento di Hooiberg

Black Immigrant Daily News

*e meta ta pa Hooiberg bira un atraccion colorido pa local y turistanan

ORANJESTAD (AAN) – Dialuna mainta, Minister Dangui Oduber, titular di Salud y Turismo a hiba palabra den e conferencia di prensa di gobierno.

E rueda di prensa aki a tuma lugar riba e trapinan di Hooiberg, pa anuncia e fase 2 cu gobierno ta bay cuminza cu su ehecucion. Fase 1 a cuminza durante e Gabinete Wever-Croes 1 y a wordo financia door di e fondonan di TPEF (Tourism Product Enhancement Fund).

Den e fase dos aki gobierno lo percura pa drecha e trapinan for di comienzo te e top. E dignatario a subraya cu intencion tabata pa cuminza mesora cu e fase 2 y e mandatario a expresa cu e ta contento di ta para riba e trapinan di Hooiberg pa anuncia e continuidad di e proyecto.

E mandatario a bisa cu ta bon conoci cu e pandemia a pone cu tabata tin un recess den e ehecucion di tur e proyectonan di mehoracion di e producto Aruba cu tabata den planificacion, y un di nan cu tabata cla e ora ey pa cuminza ta e fase 2 di e embeyecimento di Hooiberg.

E dignatario a subraya cu Hooiberg ta un atraccion cu ta wordo hopi uza pa local y turistanan. Minister Oduber a agrega cu Aruba Tourism Authority, generalmente ta haci surveys riba e “guest satisfaction” di e turistanan cu ta bin Aruba, y nos Isla ta score hopi halto den esaki. Mas ainda, e ta score di mas halto cu henter e Caribe, pa loke ta satisfaccion di turista. Pero algo cu ta bin regularmente dilanti, ta cu e turistanan ta haya cu Aruba tin falta di atraccionnan. Aruba tin un bunita lama, bunita beachnan y bon clima. Nos hendenan ta hopi amable y cordial, pero toch ta bin dilanti e turistanan ta sinti falta di atraccionnan y pesey e Gabinete y Prome Minister mes cu ta encarga cu e proyecto di “amenities” ta purba na crea mas atraccion pa e turistanan.

E dignatario a subraya cu Hooiberg ta un bunita lugar pa haci di dje un atraccion mas y mas ta wordo bishita pa e turistanan. Pesey, Gabinete Wever-Croes a opta pa planea e proyecto aki den diferente fase.

El a reitera cu fase 1 a wordo financia pa TPEF, y awo fase 2 ta bira e drechamento y mehoracion di e trapi for di ora bo cuminza subi e cero te riba e top.

E mandatario a duna di conoce cu lo bay crea un mirador cu e bishitantenan por cana rond riba e top di e cero unda ta bay tin henter un bunita bista riba e bunita naturaleza y paisahe cu Aruba ta ofrece.

Tambe lo bay percura pa pone mosaic cu artistanan local y internacional pa asina crea un atraccion completo.

Minister di Turismo a sigui splica cu pa loke ta fase 2 y fase 3 cu ya caba ta den discusion, y pensa kico mas lo por crea pa asina por acomoda e bishitantenan tanto local como turista, e intencion ta pa pone espacio pa toilet, pa asina nan por haci uso di dje. Tambe tin intencion di pone un F&B chikito, pa e bishitantenan refresca. E proyecto aki ta wordo financia parcialmente door di Aruba Tourism Authority y tambe door di TPEF. Y, conhuntamente, lo percura pa ehecuta e di dos fase. Pa e fase tres ora ta cla cu fase 2 tin cu wak kico ta e presupuesto cu tin disponible, pa asina por sigui cu e ehecucion di fase 3.

NewsAmericasNow.com