Ministerio Publico mandando mensahe cla y raspa encuanto uso di violencia contra Polisnan

Black Immigrant Daily News

Cu exigencia di 11 aña di prison

ORANJESTAD (AAN): Riba Diabierna, Fiscal di Husticia a exigi un castigo di prison di 11 aña contra e sospechoso Jonathan K. di 25 aña di edad, kende ta worde acusa di un intento homicidio di un agente policial di rango brigadier di Cuerpo Policial di Aruba.

   Tur cos a cuminza Diadomingo 1 di Mei 2022 un poco despues di 2:35 am, ora cu un Polis Motoriza a para un Toyota Tercel color berde cu number A-34229 pa un control di trafico. El a duna e chauffeur un señal pa para, y el a cumpli cune. El a para e vehiculo riba caminda grandi di Playa pa Noord, net otro banda di e rebendedor di Sherwin-Williams na Boegoeroei 85-D. Polis a bay pa atende e chauffeur, cu el a reconoce como e hoben recidivista Jonathan K., un persona cu na numeroso ocasion a haya problema cu Polis y cu Husticia.

  Diripiente Jonathan a sali bay cu su auto diripientemente, primi trot y cu velocidad halto, caminda el a lastra e agente policial casi 100 meter y a bay riba un palo di luz, y a lage benta abao net dilanti Boegoeroei 26-A.  E auto mes cu Jonathan tras di stuur a sigui core y desaparece.

   E agente policial di 31 aña di edad a resulta muy gravemente herida den e caida y boksmento cu e palo di luz.  Polis bin haya e Toyota Tercel aki para como 140 meter mas leu for di unda el a laga e agente policial benta abao. E Tercel tabata abandona y a djis lage atras blokeando garage di un cas na Boegoeroei.

   Mas despues a haya den e auto un arma di candela. Banda di posesion di e arma aki ta acusa e sospechoso tambe di a menaza dos persona na un lugar nocturno e mes anochi ey cu un arma di candela.

   E Diadomingo mainta ey, Jonathan K. di 25 aña biba na Papaya a bay entrega su mes, y mesora el a wordo deteni y encarcela.

   Ministerio Publico ta tuma e sospechoso sumamente na malo cu el a comete violencia contra un agente policial. Trahadornan di ayuda manera polis mester worde yiust proteha contra tur forma di violencia. Sigur den un caso manera esaki cu no tabatin ningun motibo pa violencia.

   Corte lo dicta sentencia riba 4 di November pa 8:15’or di mainta.

NewsAmericasNow.com