Partido MEP ta desea Ady Thijsen exito den su funcionnan nobo

Black Immigrant Daily News

ORANJESTAD (AAN): Diahuebs 13 di october 2022 sr. mr. Ady Thijsen a huramenta dilanti di nos Gobernador Alfonso Boekhoudt como Minister Plenipotenciario na Den Haag, Hulanda.

          Cu e huramentacion aki tambe a termina cu tur e speculacion, instigacion, calumnia y falsedad cometi contra sr. Thijsen, caminda opositornan politico y cierto media comprometi diariamente tabata fomenta e mentira cu sr. Thijsen lo no pasa e screening, pues cu e lo no ta ministeriabel. Pero awe a keda demostra un biaha mas cu ora bo ta un politico integro y sincero manera Ady Thijsen, nada lo por stroba pa bo por ocupa un funcion asina importante den Reino Hulandes. Fuera di e funcion di GevMin, Ady lo ocupa tambe e funcion di Representante di Aruba na Brussel (Union Europeo).

                Desde 2005 Ady ta milita den nos partido MEP como candidato di Savaneta y vecindario. Un persona hopi leal, un hurista bon prepara cu tin tur confiansa di nos partido pa ocupa pa varios aña e funcion di parlamentario (2005-2021) y tambe di Presidente di Parlamento (2017-2021) y cual funcionnan el a ocupa cu gran sabiduria y capacidad.

                Locual semper a resalta di Ady tabata su forma elocuente di hiba su debatenan, cualnan semper tabata alcaso, profesional y cu hopi dedicacion y specialmente Ady como experto tin un conocemento amplio riba tereno estatal, constitucion y den relacionnan den Reino. Sin duda cu su conocemento aki lo yuda grandemente na estrecha e lazonan entre Hulanda, Union Europeo y Aruba.

          Mester remarca tambe cu sr. Thijsen a demostra su gran humildad na momento cu el a acepta di traha den 2 funcion importante ricibiendo un salario pa e funcionnan aki.

                Partido MEP ta hopi orguyoso di sr. Thijsen y ta desea su persona tur clase di exito, sabiduria den su esfera di trabao nobo na Hulanda.

Y finalmente pa quote un expresion exclusivo di Ady: “Mientras MEP ta existi, Aruba ta salba”.

NewsAmericasNow.com