Eduardo y Gerardo de Veer  a contesta retonan pa Aruba!

Black Immigrant Daily News

Visionarionan a kibra nubia scur y a pone solo sali pa e pais

 *Accion pionero a cambia crisis nacional den pan riba mesa

* Diversificacion empresarial ta e base di democracia bibo 

ORANJESTAD(AAN)- Pa por biaha den historia economico di Aruba, uno di e guianan mas importante di pasado pa awe, ta e papel cu Meta Corporation, MetaCorp, a hunga den e e produccion economico, cu a sostene e produccion financiero y social di Aruba.

Pa kibra nubia scur y pone solo sali, mester permiti logronan y hechos papia.

Mester describi na hobennan cu nan propio estilo, un motibo pa descubri den e logronan di MetaCorp, e inspiracion pa nan tambe bira pionero den e proceso economico nacional, cu ta mara na cambio di tempo y ta crea tur dia exigencianan y oportunidadnan nobo na e empresario.

Ta e habilidad pa reconoce e posibilidadnan cu ta wordo entrega den e gira di mundo, ta haci un hende visionario, cu ta emprende e ruta pa yega na exito pa su mes y pa su pais.

Na varios ocasion DIARIO a splica, cu ta den crisis mundial grandi, cambio ta presenta y evolucion empresarial mundial ta tuma luga.

Awe nos ta presenta dos gigante den e mundo empresarial di Aruba, pa asina splica e hobennan cu awor ta e momento pa acepta retonan scondi den tanto problema, cu mester soluciona.

Eduardo y Gerardo de Veer ta dos Capitan di Industria, cu ta entrega na e hoben e prueba cu riba tur tereno tin reto, cu e alma empresarial ta descubri pa transforma den un negoshi cu ta cambia e panorama di desesperacion den luznan na un horizonte nobo.

E rumannan Eduardo y Gerardo de Veer, ta miembronan di un famia cu ta destaca den e reconocemento di retonan comercial y sigur e diversificacion tan importante den nan proyectonan empresarial.

Diversificacion ta uno di e aspectonan mas importante pa un pais democratico, cu ta depende di e resultado comercial pa mantene su economia bibo y asina produci pa e proceso financiero di e pais, cu mester garantisa un sociedad un base social, cu ta deshaci di miseria hasta den casnan cu mester di asistencia social pa nan sobrevivi.

Diversificacion ta importante den mundo empresial cu ta crea trabou y segun reglanan di democracia mester ta e fuente mas grandi di trabou pues di entrada di e ciudadanonan.

E hecho cu cada hende ta diferente, cu talento diferente, cu interesnan diferente, ta haci cu mester di diferente tipo di trabou pa asina trahadornan por goza di un entrada  a base di nan trabou na cual nan por entrega nan mes a base di nan talento.

Ora nos papia di Meta Corporation nos ta papia di teatro y recreo. Nos ta papia di necesidad di servicio di transporte, manera Meta Corporation tabata brinda Lago.

Eduardo y Gerardo de Veer ta parti di e famia cu a profila den actividad comercial creciente, cu ta brinda oportunidad creciente di trabou pa hende cu tur tipo di talento.

Refresco y cement, shopping center na Boulevard na un Aruba, cu a mira mundo basha abou ora na vispera di Status Aparte, Lago a despedi di Aruba.

Den e tempo aki, nos tabata scucha e relatonan di hobennan cu no tabata mira futuro mas. Nos tabata atende cu famianan den problema social serio y Arubianonan cu despues di e ultimo sonido di Lago, a paketa nan maleta y a bay Hulanda.

E centro di Oranjestad tabata tristo ora Eduardo de Veer y Gerardo de Veer a papia di un proyecto cu lo a cambia e cara di e ciudad capital di Aruba.

E prome hotel den centro di Oranjestad a mira luz. Un brug a conecta lama y e centro comercial di Playa cu a bira un reto pa futuro.

Comercio local a wordo rebiba cu e vision di un famia cu a crea actividad economico pero a entrega e Arubiano oportunidad di trabou, cu ta central pa dignidad di hende. Trabou riba tur tereno cu e momento ta exigi.

Clima ta dicidi riba medio ambiente, cu tambe ta central den e labornan diversifica cu ta servicio cu e Arubiano por presra na su pais pa medio di trabou na MetaCorp.

Aruba mester di inspiracion pa e por enfrenta momentonan sumamente dificil di henter mundo, cu na Aruba sigur por topa cu inspiracion.

Gerardo de Veer y Eduardo de Veer awe ta entrega un reto na generacionnan hoben. Descubri y acepta e reto di 2023 y e portanan scondi cu Capitannan di Industria mester habri pa un Pueblo por sigui cana y traha riba su futuro!

NewsAmericasNow.com