Varios pregunta tocante di e canasta basico y control di supermarket haci na Ministro Geoffrey Wever

Black Immigrant Daily News

ORANJESTAD (AAN): Despues di scucha varios keho di pueblo tocante di e aumento di prijs di alimento, Parlamentario Marco Berlis di MEP

a formula e preguntanan di pueblo pa asina Minister Geoffrey Wever, Minister di Economia, Comunicacion y Desaroyo Sostenibel.

   Tin preocupacion bao di pueblo, sinembargo nos sa cu inflacion halto a asota tur pais globalmente. Esaki sigur alimenta pa e guera entre Rusia y Ukraina, prijs di Petroleo halto, flete cu a subi drasticamente, scarcedad di producto y tambe un economia Arubano bao presion.

   Pa e motibonan aki mi a puntra Minister Wever e siguiente preguntanan:

  (1) Minister por duna Parlamento un rapport con frecuentemente e ekipo cu ta controla prijs di canasta basico ta sali controla? Adicionalmente, e rapport aki por contene e nomber di e negoshinan y e fechanan cu a controla esakinan?

  (2) Pa tur clarificacion, minister por manda mi un lista di e productonan exacto cu ta parti di e canasta basico actualmente?

  (3) Minister por duna mi un rapport di e infraccionan cu a worde cometi pa negoshinan, e fecha di esakinan, e nomber di negoshinan y cuanto infraccion tin pa luna y anualmente?

   (4) Tin algun indicacion cu gobierno lo bay of kier introduci mas producto den e canasta basico?

   (5) Minister por duna mas informacion di e app di Economische Zaken cual pueblo por usa pa por monitoria e prijsnan di productonan?

   (6) Como Minister di Economia, cual ta minister su opinion tocante aumento di minimum loon pa 1 januari 2023?

   (7) Minister ta kere cu un aumento di minimum loon lo haci un impacto positivo riba nos economia? Si e contesta ta no, por argumenta esaki, considerando cu 60% di nos poblacion ta cay bao di e bracket di entrada aki?

   Preguntanan di pueblo merece nan contesta y accion rapido.

   “Di e forma aki como representante di pueblo mi a cuminsa cana un caminda pa purba yuda bin cu ideanan pa ta parti di un posibel solucion pa pueblo den e temporada difícil aki. Ademas pueblo merece contesta riba nan pregunta y kehonan, y como su representante mi ta ocupa mi mes pa vocifera, cuestiona pero tambe aporta pa asina mi por ta un agente di solucion memey di un crisis economico global,” Berlis a bisa.

   E Parlamentario a indica cu un representante por haci mas cu djis su trabao, y esaki ta tuma curason. Ademas di su debernan e ta activo den pueblo pa por asisti unda cu e por. Pesey e simannan cu a pasa tambe el a elabora y sugeri pa subi salario mínimo. Su speranza ta keda cu lo considera pa por haci esaki ainda pa Januari 2023.

NewsAmericasNow.com