Pakico Evelyn Wever-Croes por wordo yama lider?

Black Immigrant Daily News

Tur dirigente no automaticamente por yama nan mes lider

*Un lider ta alma di un causa na momentonan mas dificil

*Ta den tormenta e capacidad di un capitan ta bini dilanti 

ORANJESTAD (AAN) — E fin di siman aki, Partido MEP a tene un evento pa celebra e aclamacion di Evelyn Wever-Croes como lider di e partido.

Partido MEP a dicidi cu e kier Evelyn Wever-Croes como lider. Awor pakico lo por yama Evelyn Wever-Croes, lider di Aruba?

Un lider a destaca. El a haci algo pa cual e lo drenta historia como un persona cu tabata capitan di e barco Aruba, na momento cu e pais tabata pasa den tormenta grandi.

Un resumen pa por confirma cu Evelyn Wever-Croes mester wordo yama “lider” ta cuminsa cu e situacion na Aruba, na momento cu Evelyn Wever-Croes a bini dilanti.

Na entrada di Siglo 21, sin duda Aruba a topa cu problema serio.

Prome cu prome decada di Siglo 21 a termina, mundo a conoce un recesion mundial cu a afecta henter mundo y asina Aruba tambe.

Den e tempo aki por mira con medidanan mester a wordo tuma, na momento cu riba tereno petrolero tambe tabata tin cambio.

Aruba durante e prome decada por a mira refineria habri, cera cu resultado serio pa entrada di Aruba.

Den e temporada cu e placa cu tabata drenta caha di Aruba pa medio di refineria tabata na peliger, a baha BBO cu resultado cu Aruba a keda sin un parti importante di entrada.

Tur hende ta na haltura cu ora entrada di placa baha, gastonan mester baha. Esaki no a socede durante e gobernacion di Mike Eman, cu mas bien manera Hulanda mes ta trece dilanti den rapportnan, a aumenta su gastonan mientras entrada di Aruba tabata baha.

E debe nacional ta un herida financiero sin igual den historia di Aruba y a marca e berdad di e gobernacion di Aruba, cu Evelyn Wever-Croes a hereda.

Mester bisa, cu Evelyn Wever-Croes a asumi e tarea di Capitan di e barco Aruba, na un momento cu e pais tabata pasa den un tormenta pisa y ya tabata tin menasa cu e barco lo naufraga.

Na e momento Aruba tabata tin mester di un lider y esaki ta e impresion cu Evelyn Wever-Croes a crea na momento cu e no a bini cu promesa bashi, pero a splica cu mester reforma e situacion economico y financiero di Aruba pa por sigui dilanti.

Ora bolbe den documentonan, hasta den rapportnan di Banco Central por ehempel, ta bini dilanti, cu ta imposibel pa mira kico lo pasa den futuro pasobra Aruba tabata den un tremendo inseguridad.

Na momento cu Evelyn Wever-Croes a haya mando di e barco Aruba, pues ni Banco Central por a duna un vision cla kico lo a pasa pasobra Aruba tabata completamente den man di Citgo, cu tabata un aventura total.

Mester a scrap Citgo for di agenda economico di Aruba y splica tur sector di Aruba cu no por conta cu Citgo.

Na e momento den un lama bruto, Evelyn Wever-Croes a entrega prueba cu e ta Capitan, cu e merece di ta lider di e pais, cu tabata tin un coalicion dificil pa loke ta trata gobernacion, pero no a cay den crisis pasobra semper Evelyn Wever-Croes tabata evita pa yega na un culminacion.

Nos por bolbe papia di e pandemia, cu a azota Aruba y a haci cu Evelyn Wever-Croes a ordena pa cera economia di Aruba.

Pero ya prome cu e pandia, el a sigura cu Aruba a bandona e aspecto mas peligroso y cu Aruba tabata tin bista cla riba un futuro sin Citgo, cu debe pa paga y trabou pa wordo haci.

Evelyn Wever-Croes a saca Aruba for di fantasia y a dirigi Aruba den e lamannan bruto te awe.

Mescos cu tur pais na mundo, Aruba tambe conoce e efectonan pisa di Guera di Ukraine cu a manda tur prijs halto.

Pero tur dia , Aruba ta ricibi un palabra di aliento di su capitan cu pidi Aruba sigui nabega pa yega e haf di futuro.

Futuro mundial, futuro di Aruba no ta facil. Recesion ta na caminda. Pero Aruba ta prepara pa futuro cu tur su retonan.

Aruba a bandona e mundo di fantasia a zink Aruba te e momento cu Evelyn Wever-Croes a lanta para y a splica Pueblo cu Citgo no ta bini, cu tin debe pa paga y cu mester traha duro pa alcansa un futuro nobo.

Ta esaki ta haci Evelyn Wever-Croes un lider. Un persona cu no ta pone hende soña pero cu firmesa ta reforma e caminda pa futuro di stabilidad na bienestar di uno y tur!

NewsAmericasNow.com