E recuperacion fuerte di e economia di Aruba a traduci su mes den resultadonan positivo pa e fondo di AOV

Black Immigrant Daily News

Edwin Jacobs, Director di SVb:

*Fondo di pension ta fuerte 

ORANJESTAD (AAN): DIARIO a combersa cu Director di SVb, Edwin Jacobs riba e desaroyonan pa loke ta 2022 y el a bisa cu sorprendentemente, si compara locual tabata e expectativanan na comienso di aña, ta mira cu e recuperacion fuerte di e economia di Aruba a traduci su mes den resultadonan positivo pa e fondonan cu SVb ta administra, principalmente e fondo di AOV, cual ta esun cu tin mas atencion di e comunidad.

            Jacobs a sigui bisa cu si mira loke tabata e prima pa gastonan ta sigui aumenta. Cu pandemia of no e gastonan ta sigui aumenta. E recuperacion economico ta hunga un papel importante, a remarca.

             A agrega cu nan referencia ta 2019. Mester corda cu na 2019 tabata un aña tremendamente bon pa pais Aruba. Si mira e entrada di prima pa e prome 9 lunanan di 2022, ta mira cu e primanan ta 2 % mas hopi prima a wordo colecta door di Departamento di Impuesto, compara cu 2019.           

            Jacobs a indica cu tin indicacion cu ta bay surpasa locual tabata un bon aña, esta 2019.

            Aworaki a haci un ultimo proyeccion di e fondo di AOV pa loke ta trata resto di aña y ta sali afo cu e fondo ta bay tin un resultado pronostica di 30.1 miyon florin y na 2019 tabata 32.2 miyon florin. Ta calcula cu e aña aki ta bay tin 6 miyon florin, kiermen mas hopi entrada cu aña 2019, a bisa.

            E gastonan di e fondo di pension di behes a aumenta cu 9 miyon, a agrega.

            Ta mira si cu e desaroyo economico ta traduciendo su mes den un bon resultado pa e fondo di AOV. Ainda mester tene cuenta cu tin un porcentahe di ‘non compliance’ y tin cu wak con ta bay atende cu esey den futuro, segun Edwin Jacobs.

            El a menciona tambe cu pa loke ta AOV ta duna espacio y minister a anuncia caba un aumento minimo di 3 % di e pension pa otro aña. Ta sigui monitorea di cerca kico ta bay bira e desaroyo pa e fondo aki y pa determina si e 3 % ey ta mas loke ta trata e recuperacion di e poder di compra di e pensionado.

            E fondo di pension ta stabil y a base di e proyeccionnan aki ta calcula cu e fondo ta bay ta agota te den e di dos mitad di aña 2030. Na  e momentonan aki no tin ningun peliger pa loke ta e fondo di pension, Jacobs a duna di conoce. 

NewsAmericasNow.com