Roderich Lopez a keda hopi feliz y ta gradici tur hende cu a yuda

Black Immigrant Daily News

Despues di a toca den Mainstreet Parade na Magic Kingdom

ORANJESTAD (AAN): Manera DIARIO a trece amplio caba den su edicion di Diasabra, tabata Diabierna atardi cu un grupo grandi di Arubiano cu nan Brassband, a subi caya di ‘Mainstreet’ di Magic Kingdom na Walt Disney World, pa asina entrene publico.

   Mas dilanti por a mira Roderich Lopez ta habri parada como Master di Band, cu e bandera grandi di Aruba den su man.  Su tras un banner traha door di Disney cu ta anuncia ‘Asambeho School Roderich Lopez Massive Brass Marching Band’.

   Ora a puntra con Roderich a experiencia esaki?  E no tabatin palabra.  E sa cu nan a cera e parada, y tras di e Brassband tabatin hopi hende cu a subi y dal un jump-up nan tras.

   Un di e coordinadornan di Disney, esta Devon a informa Roderich cu nunca el a mira hende ta “balia” tras di un Marching Band di e forma aki den Disney.   Roderich a bise, cu esey ta e estilo di Aruba!

   Roderich a mustra e coordinador Devon algun video pa mira con ta jump tras di Brassband, y el a invite pa bin Aruba pa check Carnaval pa su mes.

   Segun Lopez, loke tabata impresionante pami dilanti cargando e Bandera durante e parada tabata e fan club cu tabata grandi.

   “Y nan a jump cu nos di comienzo te final.  E ta mustra cu unda tin Arubiano y e musica di Asambeho resona, hunto cu nos Bandera, e Arubiano semper ta bon representa.”

   El a bisa cu e kier manda un danki na tur presente pa haci’e extra special cu ainda ta ser papia masha hopi mes di dje.  Hopi bandera di Aruba a luci tanto Grandi y Chikito hasta turista nan cu a bishita Aruba hopi biaha a scucha a join nos y hopi a bin di ley pa yega Magic Kingdom pa e gran toca Historico aki.

   El a gradici tur hende presente, tur hende di e band, e bailarinanan, trainers, ayudantenan, esnan di TBS Brassband cu a reforza, e mayornan cu a viaha tambe.  “ Danki na cada un presente!  Danki pa carga Aruba!  Hunto cu nos!”

   Tambe el a mustra un potret ora e ta gradici su esposa Emmeline Lopez-Boekhoudt, pa nunca a stop di kere den Roderich.  “Danki pa bo amor.  Dushi, hunto nos a logre.  Un soño cu a bira realidad hunto cu bo, abo sa y conoce tur mi soño nan.. Laga e potret aki contabo e magia cu ta sparkle pa semper.  Love you, amor.”

NewsAmericasNow.com