Ta bezig ta restructura y evalua con e cuido di e adicto ambulante lo wordo brinda na Aruba mes

Black Immigrant Daily News

Minister Rocco Tjon a duna di conoce:

ORANJESTAD (AAN):   Minister Rocco Tjon a duna di conoce c’un di e puntonan cu e diferente gruponan di trabao cu ta bay atende cu e problematica di adicto ambulante ta traha riba dje ta e ‘buitenlandsezorg’.

            El a señala cu algun siman pasa a haya un presentacion amplio di un comision cu a bay den exterior y den e caso aki tabata Colombia, pa bay evalua e calidad di cuido cu ta wordo brinda.

            Segun e mandatarionan, e opinionnan ta diferente riba e aspecto aki y un punto importante ta cu e rehabilitacion lo mester den e pais caminda e persona ta biba.

            Ta bezig ta restructura y evalua con e cuido aki lo wordo brinda na Aruba mes. Esaki tin su aspectonan financiero mara na dje y lo mester wak bon tambe e proyeccion riba kico ta e gastonan cu tin aworaki na clientenan cu ta wordo manda den exterior. Mester wak con esaki lo por wordo acapara na Aruba mes pa di e forma ey brinda un cuido di calidad na e isla, e mandatario a splica.

            No ta solamente e cuido cu ta brinda nan, pero tambe otro circumstancianan cu por influencia cu nan ta cay bek y esey tambe lo mester haya su atencion. Pesey hopi profesional ta bisa cu e parti di rehabilitacion lo mester tuma lugar den e pais mes caminda e persona ta biba, Minister Tjon a duna di conoce.

NewsAmericasNow.com