A.T.A. su plan strategico multi-anual ta enfoca riba e modelo ‘High Value Low Impact’

Black Immigrant Daily News

“Desaroyo di Destino ta continua cu Baby Beach”

ORANJESTAD (AAN): Durante un conferencia di prensa, Minister di Turismo conhuntamente cu Director di DOW y CEO di A.T.A. a duna un update di e proyecto di Baby Beach.

    Segun directora di A.T.A., desde e momento cu A.T.A. a pasa di ta un Destination Marketing Organization (DMO) pa un Destination Marketing and Management Organization (DMMO), a cuminsa enfoca riba diferente proyecto y tarea cu ta resorta bao di e responsabilidadnan di desaroyo di destino. Entre e responsabilidadnan aki ta resorta por ehempel siguridad, servicio, cultura, lugarnan atractivo pa potret e asina yama “instagrammable spots” y mas cu claro Aruba su playanan, parti esencial di e destino como un di e recursonan natural di mas importante.

   Den transcurso di e añanan A.T.A. tabata parti di diferente proyecto di mehoracion y embeyesimento di playanan manera por ehempel e proyecto di reposicionamento di santo entre otro den area di Bushiri, drechamento y mantencion di palapanan, ponemento di buoys y e mantencion di esaki, estudionan relaciona na awa y calidad di nos playanan, trapinan y pier di Rodger’s Beach como tambe Baby Beach fase 1 y 2.

   A cuminsa cu e proyecto pa trece desaroyo na Baby Beach como parti di e Seroe Colorado Masterplan algun aña atras cu intencion pa embeyece y desaroya Baby Beach y Rodger’s Beach.

   Cu fase 3 di Baby Beach lo desaroya e area di parkeo pa evita parkeer riba santo blanco y lo extende e voetpad connectando e playanan cu na mesun momento ta forma un barrera entre playa y area cu vehiculo motorisa por yega. Lo planta mas mata indigeno pa crea mas area fresco bou guia di DNM y FPNA. E turtle wall existente lo wordo hala atras pa crea mas area di beach y e trapi cu ta subi bay Seroe Colorado lo keda restaura.

   Den e siguiente fase (na 2023) lo sigui extende e voetpad te cu Rodgers’ Beach, e tennisbaan lo wordo restaura, dos kiosk pa F&B/retail lo wordo construi, e area di Rodgers’ Beach su beach lo wordo expandi, caretera lo wordo adapta y parking lo wordo structura diferente.

   A.T.A. lo sigui traha di cerca cu Minister di turismo, ministerio di turismo y otro partidonan y socionan pa asina por cumpli cu e maneho di turismo delinea.

Algun otro proyecto cu por menciona den e categoria aki ta por ehempel e restauracion di e pier patras di RIU, restauracion y embeyecimento di trapi di Hooiberg, trails pa Mountain Bike, trabaonan pa drecha e costa di Bushiri, e Aruba Happy One Pass (HOP) y tambe embeyecemento di e trapi na Rodgers’ Beach cu Mosaic.

   Adicionalmente di A.T.A. su rol pa facilita e diferente proyectonan aki, A.T.A. tambe tin un rol importante pa boga y para pa desaroyo sostenibel di Aruba como destino, balansando asina e necesidadnan di e comunidad cu esunnan di e bishitantenan. Como parti di A.T.A. su plan strategico multi-anual ta enfoca riba e modelo ‘High Value Low Impact’ unda ta considera e contribucion economico di turismo, e calidad di e experiencia di e bihitante, e proteccion y conservacion di medioambiente y e calidad di bida di residentenan pa asina por yega na resultadonan turistico di balor halto, minimisando e impacto cu esaki por tin riba Aruba. Pa e motibo aki A.T.A. ta forma parti di diferente comite hunto cu otro socionan manera e ‘Infra Tourism Committee’, ‘UTV/ATV Committee’, ‘Watersports Committee’ y tambe e ‘Aruba Amenities Committee’.

   A.T.A. lo sigui forma parti di oportunidadnan unda por crea desaroyo di destino den un forma sostenible pa por garantisa e bienestar di Aruba y su residentenan.

NewsAmericasNow.com