Balor di hende ta exigi velocidad maximo den trafico!

Black Immigrant Daily News

Aruba ta un zona pobla cu largura di 33 km. y hanchura di 9 km.

*Introduci aparatonan special pa auto pa pone fin na horor

* Velocidad ta decisivo pa seriedad di accidentenan den trafico 

ORANJESTAD(AAN)—Topa cu un accidente pisa di trafico, ta mescos cu yega na un lugar cu a wordo alcansa dor di un bom, cu ta destrui pa e mes motibo, e mes principio, cu e impacto entre dos auto.

Un bom riba su mes no por mata. Ta e forsa cu cual e ta move, su velocidad, ta su destruccion.

Kico un accidente ta produci? Loke ta topa riba un campo di bataya, cu ta destruccion.

Mas halto e velocidad cu cual ta maneha un auto, mas destructivo e ta bira contra hende inocente cu no ta haya oportunidad di scapa nan curpa pasobra na mayoria di ocasion, e impacto ta asina sorpresivo, cu hende no ta haya tempo pa reacciona.

Responsabilidad ta un factor grandi den bida pero sigur den trafico, cu manera tanto bez nos a yega di splica, ta uno di e motibonan grandi cu e calidad di bida di hende cu sobrevivi, a wordo pa semper destrui.

E balor di hende ta exigi pa na Aruba introduci un maximo di velocidad, mucho mas abou cu Aruba conoce y cu mester wordo respeta, sea cu e automobilista kier of no kier!

Unico forma pa por exigi tur vehiculo pa mantene e velocidad maximo, ta den introduccion di instalacion obligatorio di aparatonan, cu no ta permiti un auto bay mas halto cu e velocidad maximo.

Pa yega na e conclusion aki, mester mira di kico ta papia ora atende cu trafico na Aruba.

Aruba ta un isla cu un largura di 33 kilometer. Aruba tin un hanchura di entre 9 pa 10 kilometer. Kico esaki ta nifica?

Aruba ta un zona pobla. Pa reglanan internacional di trafico, esaki ta nifica cu mester tin maximo oficial di velocidad cu ta cuadra cu un zona pobla, pues un zona den cual hende ta biba y ta trafica.

Ora tuma nota di velocidad oficial den zonanan manera henter Aruba ta cualifica, ta papia den mayoria di caso di un velocidad maximo di 50 km. pa hora, cu ta permiti un chofer reacciona y ta baha e intensidad di un impacto,.

Velocidad ta dicidi pa e intensidad di un impacto cu un escala cu ta subi na un forma mucho mas acelera cu hopi hende ta pensa.

Mantene 75 kilometer pa hora ta nifica cu e velocidad ta bira cuatro biaha mas halto cu ta e caso cu 50 kilometer pa hora.

Ora papia di un velocidad riba cien kilometer pa hora, ta papia di un proyectil mortal, cu hende no por controla.

E persona cu perde su bida den un accidente di trafico, no ta haya oportunidad pa despedi di bida. E ta wordo destrui dor di decision di un persona irresponsabel cu ta maneha un vehiculo, pero no por maneha su propio sentido di responsabilidad.

Cu tin hende cu ta bira malo tras di stuur, ta un realidad. Esaki ta haci cu personanan cu ta na haltura cu nan tin un problema cu salud, no por maneha un auto y sigur na un velocidad, den cual nan no por controla e vehiculo.

Durante yobida hende no por controla un vehiculo a menos cu ta mantene distancia prescribi pa ley y no ta core na un velocidad halto, cu ta causa cu vehiculo por bolter.

Si un persona cruza caya sin presta atencion, e chofer no por reacciona na tempo y evita morto, si e ta mantene un velocidad halto.

Nos ta bolbe na e largura di Aruba. Den menos cu un hora por cruza Aruba di un punta pa otro, si tene na regla y uza cabez ora ta construi caretera.

Un tragedia a bira realidad di un famia y di Aruba durante fin di siman.

Impone velocidad maximo. Impone cu e persona cu persona cu no tin responsabilidad y ta maneha un vehiculo mientras e ta burachi, no solamente ta wordo castiga, pero nunca mas por ta chofer.

Husticia mester dicidi kico a pasa na Colony. Mientrastanto, mester tuma medidanan cu por tuma.

Baha velocidad maximo riba caretera. Deshaci di e rosea di morto y di e dolor di hende cu no a muri pero cu a keda pa semper destrui den accidente cu otro a provoca.

NewsAmericasNow.com