E estudiante Arubano na Hulanda den tempo di crisis

Black Immigrant Daily News

Inflacion ta alcansa nan tambe den temponan dificil

*Plannan pa estudiantenan Hulandes ta expone problema

*Problemanan social Hulandes ta afecta e Arubiano tambe 

ORANJESTAD(AAN)—Conflictonan mundial ta sigui presenta. E panorama pa 2023 ta sigui mustra riba un recesion, cu mundo no por evita.

Problemanan sigur ta bati tambe na portanan Hulandes, caminda e palabra inflacion no ta desconoci y sigur den e tempo cu ta bini lo no pasa pa historia.

Ya prome cu e crisis di 2022 provoca pa e Guera na Ukraine a bati na porta, mundo estudiantil general na Hulanda tabata conoce problemanan structural cu a afecta estudiantenan di Aruba y otro paisnan tambe.

Ora papia di problemanan social di un pais, no mester mira unicamente falta di placa.

Den caso di Hulanda hasta por conclui, cu ta pasobra placa tabata y ta lora ainda na Hulanda, hopi problema social a mira luz y awe ta wordo uza hasta den  forma cu Hulanda ta hiba su maneho riba asuntonan cu indirectamente ta mishi cu e ambiente social.

E punto aki a bini oficialmente dilanti ora instancianan oficial mester a busca mas trahador profesional den exterior y a expresa temor pa e presion social cu esaki por nifica.

Hulanda ta un pais chikito, cu a bira sumamente popular cerca migrantenan cu tur resultado cu esaki tin, no solamente pa Hulandes Europeo pero tambe pa e Hulandes Caribense, manera Arubianonan cu kier ta parti di e convivencia Hulandes, cu ta exigi un infrastructura.

Falta di vivienda ta uno di e problemanan social grandi cu Hulanda a conoce y cu tin su raiz tanto den costumber Hulandes como e atraccion cu Hulanda ta pa ciudadanonan di paisnan den desaroyo, cu kier habri caminda pa futuro.

Segun costumber Hulandes un hoben na cierto edad, ta bandona e cas di su mayornan pa biba na forma independiente.

Uno di e problemanan serio cu a afecta Arubianonan na Hulanda tambe, tabata e falta di vivienda y exigencianan Hulandes riba e tereno aki.

E pandemia a crea situacionnan dificil na Hulanda pero tambe e guera na Ukraine cu tur su resultadonan directo y indirecto.

Tabata tin algo cu den tempo bon y tempo malo Hulanda tabata brinda, cu tabata e sensacion di seguridad riba tereno social, su na 2022 a bini abou ora Guera di Ukraine a crea problemanan social enorme, cu a afecta e estudiante Arubiano tambe.

Aumento di prijs no ta facil pa e hoben Arubano na Hulanda, caminda e medidanan di Gobierno Rutte a duna poco alivio manera pa loke ta trata prijs di energia.

E ta alivia e situacion, pero e no ta e solucion total sigur no na momento cu e temporada friu a bati na portanan Hulandes.

Prijs di petroleo a baha pero inflacion a mishi cu e Euro cu a perde su balor y ayera tabata na mes nivel atrobe cu e Dollar Mericano.

Fin di 2022 ta acerca cu demanda mas halto di energia riba un mercado mundial, caminda prijs di petroleo a baha pero no ta nifica cu imediatamente tur problema ta tras di lomba.

Bida sigur no ta facil ainda na Hulanda, caminda e estudiante Arubano mester sigui traha riba su futuro cu ta depende di tanto aspecto.

E plannan cu Gobierno Hulandes a presenta pa e estudiantenan Hulandes, ta expone e realidad cu estudiantenan internacional y di Aruba tambe, ta experencia.

Pa loke ta trata vivienda Gobierno Hulandes a priminti studiantenan cu durante e proximo ocho añanan, e lo construi 60 Mil vivienda pa estudiante. Pa futuro pues por tin un solucion. Kico ta haci na e momentonan aki? DIARIO lo keda den contacto cu Hulanda pa asina por tene Aruba informa!

NewsAmericasNow.com