Minister di Turismo a anuncia comienzo di proyecto di plaza y anker na Cas Ariba

Black Immigrant Daily News

ORANJESTAD (AAN): Diamars minister di Turismo y Salubridad Publico, Dangui Oduber a tene un conferencia di prensa na e cruzada di Cas Ariba

banda di e anker famoso cu varios hende incluyendo turista ta wak ora cu nan ta bayendo den direccion di Parke Nacional Arikok.

E minister a cuminza na bisa cu pa hopi tempo caba discusionnan tabata andando riba un upgrade y mehoracion di e producto di Aruba.

“E maneho y e vision di ministerio di Turismo ta dirigi riba busca y trece e turistanan afluente, turistanan di calidad cu ta laga hopi placa atras den nos economia”.

E intencion ta tambe pa diversifica e diferente mercadonan di turismo y percura pa nos keda haci inversionnan den upgrading y mehoracion di producto di Aruba, pasobra naturalmente ora cu un turista scoge Aruba como su destinacion, nos kier ofrece un producto y un infrastructura di calidad pa nos turistanan, segun Oduber.

El a sigui bisa cu ta pesey ultimamente a anuncia diferente proyecto di upgrading y mehoracion di infrastructura, unda cu hunto cu Aruba Tourism Authority, Tourism Product Enhancement Fund, Departamento di Infrastructura y D.O.W a forma un comision di Infrastructura, cu ta encarga pa maneha, supervisa y guia tur e proyectonan di mehoracion y upgrading di infrastructura.

Segun Oduber, asina recientemente a anuncia e proyecto di fase dos di Baby Beach, cu dentro di e proximo simannan lo cuminza.

“Nos a anuncia tambe e proyecto di upgrading y mehoracion di Hooiberg, cu ta bay bira un atraccion pa turistanan y tambe nos a anuncia recientemente cu nos ta bay drecha e trapi na Rodgers Beach cu mozaik”, segun e mandatario.

El a indica cu su presencia na Cas Ariba Diamars tabata pa anuncia un bunita proyecto, despues di a hiba combersacion cu e grupo cu ta organiza tur e actividadnan riba Dia di Betico riba Plaza Deto Varis.

“Nan a presenta un concepto y idea pa haci e area aki un atraccion pa turistanan”.

Considerando e hecho cu ta miles di turista ta trafica e area aki anualmente pa bay Parke Nacional Arikok, nos a haya sigur esaki un bunita idea, un bunita concepto, teniendo na cuenta tambe cu nos kier percura pa ofrece mas atraccion posibel na nos turistanan, caminda cu nan tin areanan unda cu nan por para disfruta y saca potretnan cu nan ta post riba social media, segun Oduber.

El a sigui bisa cu e proyecto a cuminza, unda cu e idea ta pa drecha e plaza y e anker, unda cu e anker lo wordo poni na mas cu 1 meter halto.

E anker lo haya e color di oro, mientras cu e plaza ta bay keda hopi bunita tambe.

NewsAmericasNow.com