Alvin Molina di MEP ta spera cu por cuminza cu proyecto di ‘Bemoeizorg’ den centro di San Nicolas

Black Immigrant Daily News

ORANJESTAD (AAN): Parlamentario Alvin Molina di MEP a indica cu tur hende na Aruba a pasa den experencia cu adictonan ambulante.

Nan ta pidi pa un Florin pa cumpra un ‘pan’ of ta pidi pa laba bo auto. Tin biaha bo por sinti incomodo, tin agresion, hasta bo pertenencianan ta worde kibra of horta.

   E fenomeno di adictonan ambulante den centro di Oranjestad y San Nicolas hopi biaha ta bin hunto cu uzamento y/of bendemento di droga, atraco y prostitucion ilegal. Adictonan ambulante ta un indicacion di inseguridad.

   E proceso pa yuda adictonan ambulante, pa preveni pa nan causa mas daño den comunidad mester worde mehora. Cuanto biaha un delincuente ta worde gara y cera, pero dentro di par di ora e ta back riba caya, cometiendo e mesun actonan indesea. Cuanto biaha ciudadanonan ta haya nan mes den problema paso nan ta haya nan mes ta tuma ley den nan man. Frustrante hasta pa e polisnan cu ta dunando e servicio na pueblo.

   Pesey mi ta contento cu nos Minister di Husticia y Asuntonan Social, Bureau Ondersteuning Verslavingszorg, hunto cu tur e stakeholders a inicia e proyecto ‘bemoeizorg’. Esaki lo agilisa e proceso pa adictonan ambulante, cu hopi biaha tambe ta un victima di maltrato of un malesa mental, por worde yuda y kita for di caya mas facil y na un manera mas efectivo.

   E proyecto piloto aki lo inicia september den centro di Oranjestad. Mi ta spera y sigur lo monitor cu pronto San Nicolas lo ricibi e mesun atencion aki. Nos kier pa pariba di brug bira back un parti di Aruba cu ta contribui grandemente na economia, cultura y bida social di nos pais. Pero e area mester ta sigur, nos mester sinti sigur, pa e ta atractivo pa comerciantenan inverti eynan, pa nos por gosa trankil di nos centro commercial pariba di brug.

   For di comision di husticia mi lo invita e stakeholders cu ta envolvi cu ‘bemoeizorg’ pa asina nos por haya un splicacion mas detaya con e proceso lo bay funciona, pero vooral tambe kico nos por haci como Parlamento, si tin necesidad pa cu cambionan den ley pa nan por haci nan trabao mas efectivo y eficiente

NewsAmericasNow.com