Stan Dabian a confirma cu e ta bayendo cu VUT for di Departamento di Cultura Aruba

Black Immigrant Daily News

El a yuda hopi pa Cultura wordo hisa na halto

ORANJESTAD (AAN): Tabata como un aña y mey pasa, cu a celebra e hubilo special cu Stanley ‘Stan’ Dabian a cumpli 40 aña trahando pa Gobierno di Aruba!  Un logro fenomenal y sigur admirable.

   Siman pasa durante un actividad di inauguracion di e expo “Lens di mi Wowonan” en conexion cu Dia di Prensa, Stan Dabian tabata e maestro di ceremonia.  E ta un persona cu gusta cultura, e ta hasta hinca den su DNA, y pesey semper e tey cla pa yuda cu su conocemento, conseho, y sigur guia pa tur loke ta promove y conserva cultura di e isla, cu braza habri.

   Na final di e actividad, Stan Dabian a haya chens di papia cu DIARIO pa mustra riba e retonan cu ainda tin nos dilanti pa keda defende cultura, y sigui promove esaki cerca nos futuro generacion.

   El a bisa esaki, como cu aworaki cu casi tur hoben di chikito ta hinca nan mes den mundo di social media, esaki tin efecto cu nan por lubida riba e ‘cultura’ di e isla aki, y mas bien adapta cultura di otro paisnan.

   Stan Dabian ta un persona kende di edad hoben caba tabata yuda den tur actividad cultural den su pueblo di Santa Cruz.  Mirando e hecho cu cierto actividad folklorico por wordo experiencia na Aruba so, ta pone cu tin di traha duro pa mantene e costumber y tradicion aki bibo pa futuro generacion.

   Ora cu Stan Dabian a cuminza traha pa Gobierno, el a cuminza na Parket di Ministerio Publico.  Aki el a traha pa 16 aña largo y ta orguyoso cu el a dedica su mes 100% na e trabao ey.

   Sinembargo ora cu el a haya un chens pa bay pa e Departamento cu ta encarga cu Cultura, el a haci esey mesora!  Y e resto ya ta historia!

   DIARIO a probecha di e ocasion aki, pa gradici Stan Dabian pa e inmenso y valioso colaboracion cu prensa en general na Aruba.  Stan ta un formidable persona pa traha relato, y e ta haci esey semper cu amor, precision, y cu e meta pa pusha tur hende den mesun direccion paralelo pa nan compronde e esencia y importancia di cultura.

   Fuera di esey, e ta usa su experiencia y conocemento di personahenan, pa skirbi ‘tributo’ ora cu personanan cu a haci trabao grandi a comunidad fayece.  Su relatonan tabata sali den casi tur media na Aruba.

   Aki ta unda cu Stan Dabian a confirma na DIARIO, cu despues di 25 aña trahando den Departamento di Cultura Aruba (DCA), el a dicidi pa tuma e oferta di VUT pa asina retira.  E lo retira despues di a traha un total di 41,5 aña den Gobierno.

   El a bisa cu e lo keda si keto bay pa pusha Cultura!  Su sugerencia pa pueblo y demas coleganan den e mundo aki di Cultura ta, pa nan bin cu propio incentivo, bira un ‘self-starter’, kere den bo mes, y cu esfuerzo hunto cu dedicacion na cultural… lo bo logra esaki sigur.

   Dabian no a informa ta ki tempo e lo baha cu VUT, sinembargo di awor caba DIARIO ta manda gradici Stan Dabian pa e aporte valioso di su banda den ultimo decadanan pa sigui pusha Cultura di Aruba yega na un nivel basta halto aworaki.  E speranza tey cu tur Gobierno lo sigui pone ‘Cultura’ di e isla constantemente den spotlight, como cu e ta algo cu hamas por bay neglisha y lage cay y desaparece den e desierto di culturanan stranhero cu ta drentando awor hasta via social media

NewsAmericasNow.com