E sabor amargo di un avestruz cu lo tabata come placa

Black Immigrant Daily News

Corte di Husticia y e ruta di un  araña riba terenonan di Aruba

*E impresion fastioso cu pa bira miyonario mester ta politico 

ORANJESTAD (AAN) — Uno di e factornan cu a tene nos mas ocupa for di 2018 ta, e trabounan pa decifra tur informacion financiero di Aruba cu tabata parce di tabata scondi tras di un cielo di fantasia cu a spart for di otro.

Palabra por bisa hopi pero cifra ta papia un palabra cla, sigur si tene cuenta cu na Aruba ley ta dicidi riba e uzo di placa di Pueblo di Aruba.

Ayera mientras Benny Sevinger tabata haci su entrada na Corte di Husticia, uno di e epocanan mas asombroso den nos historia, tabata culmina den acusacionnan di Husticia contra Benny Sevinger y cantidad di otro acusado.

Asombroso, pasobra ta increibel con e Gobierno di cual Benny Sevinger tabata parti di 2009 te 2017, a hunga cu placa y interes di Aruba manera tanto rapport ta sugeri.

Nos ta tene duro na e rapport Bo Aruba cu cantidad di proyecto cu semper lo keda rondona pa misterio mescos cu e cantidad di “contratistanan chikito” den ehecucion di cierto proyectonan, cu ta manera fantasma den mondo politico scur.

Reglanan cu mester a garantisa pa Pueblo por a controla con 1.6 Biyon a wordo entrega na proyecto apto pa tur wega politico cu hende por inventa, a wordo kibra.

1.6 Biyon mester tabata parti di e placa di Pueblo cu a lora sin ningun control debido den creacion di un debe nacional y weganan politico cu Citgo, cu tambe a exigi un capital pa atende cu generalnan y comandantenan Venezolano.

No tabata ningun sorpresa cu den e caso di Husticia contra Benny Sevinger, placa lo a hunga un papel importante.

Mientras Benny Sevinger tabata na caminda pa Sala di Corte ayera, nos tabata prepara pa scucha cuanto placa segun acusacionnan lo a lora den loke por considera compra y benta ilegal di terenonan di Aruba.

Diferente articulo riba e proceso legal den Corte lo splica e acusacionnan di Huez. Nos kier para keto na e realidad mas grandi cu ta bini dilanti den otro caso di politiconan acusa di corupcion, di abuso di nan puesto.

Na e momentonan aki, manera rapportnan hasta na Hulanda y Merca ta trece dilanti, hamber y pobresa creciente ta un problema serio. E cantidad di hende pober mundialmente ta crece debi na aumento di prijs y henter e situacion mundial.

Si scucha loke a bini dilanti ayera den Corte, e impresion ta wordo crea, cu pa come bolo y steak hende mester bira politico.

Den otro articulo lo papia di e donacionnan cu ta bay pa partidonan politico cu segun por comprende di un acusado por lo menos, ta politico cu ta inspira pa haya placa pa e por haya voto.

Nos a keda atras cu e sabor amargo di un avestruz cu lo tabata come placa segun acusacionnan legal y hasta nos ta puntra nos mes cu ta pasobra avestruz ta come placa, e ta hinca su cabez den santo pa hende no mira su boca.

Ayera ora Benny Sevinger tabata yega e edificio di Corte di Husticia, e garantia cu democracia mester brinda den eleccionnan liber, a cuminsa tembla.

Kico lo pasa cu e confiansa di Pueblo den su sistema democratico mientras e caso contra Benny Sevinger como acusado principal, ta desaroya?

Con placa realmente por lora den mundo politico, cu ta kita oportunidad di e pober cu no por come y ta habri caminda pa hende golos cu ta uza loke ta di Pueblo pa nan bira Miyonario?

Paso pa paso nos ta sigui e araña cu lo ta biba den un cas cu corupcion lo a comberti den algo mas cu un cas!

NewsAmericasNow.com