Sistema electoral ta tene AVP responsabel pa araña

Black Immigrant Daily News

Benny no por tabata Ministro of den Parlamento sin lista politico

*Benny a bira Ministro a base di participacion di AVP na eleccion

*E responsabilidad di partido politico den e caso Avestruz analisa 

ORANJESTAD (AAN) — Awe un caso penal historico ta haya su inicio. Otro caso den cual directamente un politico ta envolvi. Un politico den funcion den Parlamento y acusa di a abusa di su participacion den pasado den Gobierno di Aruba.

Na momento cu Benny Sevinger presenta den Corte di Husticia, ta e representante oficial di partido AVP ta presenta dilanti Huez.

Pa por comprende e realidad di presentacion di un Ministro como acusado den Corte di Husticia, mester tene na consideracion e sistema electoral di Aruba cu no conoce persona como participante na eleccion pero partido cu ta presenta nan candidatonan pa Pueblo dicidi kende lo goberna e pais.

Benny Sevinger no por a participa na eleccion y presenta awe como Miembro di Parlamento dilanti Corte di Husticia como ciudadano Benny Sevinger.

Poniendo un banda e cantidad di voto cu el a haya of no haya, e base di eleccion di Aruba ta dicidi cu ta AVP a participa na eleccion y cu ta como parti di e lista di AVP, Benny Sevinger a haya oportunidad pa awe ta Miembro di  Parlamento.

E hecho cu Benny Sevinger ta wordo huzga pa loke el a haci of no a haci durante e tempo cu e tabata Ministro encarga entre otro cu terenonan di Aruba, cu segun acusacion a bira negoshi, ta nifica cu awe Partido AVP den persona di Benny Sevinger ta dilanti Huez.

Segun Leynan di Aruba, e sistema democratico pa alcansa un Gobierno di Pueblo, ta bira realidad pa medio di partidonan politico.

Na momento cu Benny Sevinger a bira Miembro di Gobierno di Mike Eman, e tabata representante di e partido AVP cu a dicidi cu su persona lo a dirigi asuntonan di tereno pa Aruba.

Ta AVP a haya e votonan necesario pa por a forma e Gobiernonan di Mike Eman, cu tabata tin Benny Sevinger como Ministro participante di un Gobierno.

E sistema electoral di Aruba ta entrega na un partido e decision, kende e ta presenta como su candidatonan na Pueblo di Aruba ya cu den eleccion Pueblo no por vota pa un persona sin cu e ta riba lista di un partido.

Ta partidonan ta carga candidatonan pa bira Miembro di Parlamento y asina tambe gobernantenan di Aruba, cu ta keda responsabilidad directo di e partido politico, como vehiculo pa un persona segun Leynan di Aruba, participa na eleccion.

Awe caso Avestruz ta papia directamente di e responsabilidad grandi di un partido politico den observacion y guia di e trabou cu politiconan tanto den Parlamento como den Gobierno ta haci den su nomber.

Na e momentonan aki AVP no ta lucha solamente pa Benny Sevinger, cu autoridad criminal si por persigui personalmente, wordo declara inocente den Corte.

E partido cu ta representa segun ley directamente den e persona di Benny Sevinger como Miembro di Parlamento y como Gobernante den pasado, sigur ta haya un mancha atrobe si Benny Sevinger resulta culpabel pasobra e partido a haci posibel pa Benny a participa na tur eleccion y haya funcion.

Democracia ta nifica representacion di Pueblo den Parlamento y Gobierno, na cual na Aruba solamente pa medio di un partido Pueblo por dicidi.

E partido mester vigila tur accion di su representante den Parlamento y den Gobierno, pa cual e ta keda directamente responsabel.

Pa un persona subi lista di un partido, generalmente ta investiga un persona y ta sigui pasonan di un persona, cu ta haya penalty y ta wordo saca for di e partido si e no comporta su mes.

Den e caso aki sigur hopi pregunta tocante e partido AVP ta wordo lanza debi na e hecho cu parti importante di e otro acusadonan ta conoci den fila di AVP mientras e lider di AVP, Mike Eman, a profila su mes como uno di e personanan mas cerca di Benny Sevinger tanto den politica como den bida personal.

NewsAmericasNow.com