FADA ta anuncia lansamento di 5 documentario nobo basa riba bida real

Black Immigrant Daily News

Dia 15 di September e prome documentario lo sali

ORANJESTAD (AAN): Rubiella Toppenberg, trahador preventivo di Fundacion Anti Droga Aruba (FADA) a hiba palabra diabierna mainta durante un rueda di prensa. El a duna di conoce cu esaki tabata un mainta hopi special pa FADA, mirando c’un biaha mas, despues di tres aña consecutivo FADA ta bay bolbe lansa su di cuater temporada di documentario basa riba bida real.

   Segun Toppenberg, nan documentarionan tin como meta principal pa educa, informa y conscientisa comunidad riba uzo, abuso, salud mental, adiccion. E aña aki tambe ta bay tin un serie di documentarionan cu hopi informacion a bin dilanti e aña aki.

   Dia 15 di September e prome documentario lo sali y pesey FADA ta invita comunidad completo pa wak e documentario y laga e hobennan ta parti di esaki pasobra e informacion aki ta hopi importante pa nan tambe.

   El a enfatisa cu den nan trabao diario nan ta confronta diferente situacion y casonan. Ta hopi importante pa e hobennan mira e tipo di informacion aki pasobra esaki ta bida real. Hendenan ta bay papia di diferente topico manera adiccion y salud mental cual ta bati na porta di diferente cas.

   E aña aki ta bay tin 5 storia. Tur ta storianan diferente y e meta ta cla. Pesey ta pidi pa haci bon uzo di esaki. E reaccionnan pa loke ta e otro documentarionan tabata basta positivo. Por ehempel, e prome aña a enfoca riba adiccion so. E storianan tabata hopi impactante, a splica. Aña pasa tabata tin un storia di un juffrouw cu a papia riba depresion, ansiedad y e reaccion tabata enorme, Rubiella Toppenberg a duna di conoce.

   Hopi biaha e storianan aki ta un empuhe pa un of otro persona y esey ta e meta su tras, a agrega. Pa e personanan aki busca ayudo na tempo. Banda di esaki, Amina Kelly cu tambe tin e funcion di trahador preventivo na FADA a agrega cu e storianan ta bay ta lo siguiente. Ta bay cuminsa cu e storia di un hoben cu a surpasa schizophrenia. E ta bay splica kico tur e ta haci pa sobrepasa esaki.

   E di dos storia ta di un hoben cu ta yiu di mama y tata adicto ambulante. E ta conta con esaki tabata tin un impacto riba dje y con el a pasa door di esaki. Tin un storia di un persona na Hulanda cu ta conta su storia di traumanan di infancia manera abuso sexual, verbal, fisico.

   Otro storia ta relata e bida di un persona cu ta bezig ta rehabilita y ta bay conta con su bida tabata prome y con el a surpasa e crisis.  Finalmente tin e storia di un persona cu a pasa door di ‘burnout’, ansiedad y depresion. Ta un storia hopi pisa cu ta bin dilanti, Kelly a duna di conoce.

   Ta trata di 5 storianan hopi interesante cu e meta pa e personanan eyfo sa cu tin ayudo pa loke e persona por ta pasando aden, a finalisa bisando.

NewsAmericasNow.com