Lectura impactante awe encuanto descubrimentonan arqueologico haci den awanan teritorial di Aruba

Black Immigrant Daily News

Na encargo di drs. Raymundo Dijkhoff

ORANJESTAD (AAN): Awe Diahuebs, e arqueologo local drs. Raymundo Dijkhoff lo bay ta ofreciendo un lectura cu ta forma parti di un ciclo di charla cu ta enfoca principalmente riba e Joyanan di e Herencia Arqueologico Sub-Aquatico.

   Ta asina cu hopi hende ta costumbra cu e descubrimentonan arqueologico riba tera, pero hecho ta cu Aruba tin hopi den su awanan teritorial y e awanan cu tin paden di e isla.  Pasobra tin di corda cu e ser humano di tur epoca, semper tabatin un relacion cu awa.

   E desaroyo di e disciplina aki di arqueologia awor ta acelerando, y Aruba tambe ta participando den esey pa basta aña caba, pero awor e momento a yega pa cuminza divulga tur loke a bin haya sa.

   E motibo pa esaki, ta debi cu Reino Hulandes completo desde 2019 tras di cortina ta trahando pa asina e fin di 2022 pa comienzo di 2023, e ratifica e Tratado di UNESCO di 2001, cu ta encera un convenio pa cu proteccion di herencia sub-aquatico.  Tin 70 pais rond mundo cu ya caba a ratifik’e, pero Aruba mes no por haci esey.  (E isla ta un ‘associate member’ di UNESCO).  Pues ta Hulanda tin di keda encarga cu esey.

   Segun drs. Dijkhoff, na aña 2019 a logra convence Hulanda pasobra tabatin cierto motibo logistico y parti legal cu na comienzo tabata un estorbo pa esey socede.  Pero awor e caminda ta hancho habri pa ratifica e Tratado di UNESCO numa.

   Den cuadro di esey, awor e expertonan kier bay concientiza pueblo Arubiano.  Esaki ta encera legislacion cu tin di bin, y maneho cu mester wordo imponi riba e area aki.

   Ademas, e enfoke lo no djis bira di e descubrimentonan arqueologico riba tera, pero tambe di loke tin den lama.  Aña paa mes cu a haci un investigacion den awanan di Aruba, a bin descubri 100 lugar arqueologico den awanan teritorial.  Segun Dijkhoff, e tabata un investigacion basta grandi y na October 2022 lo bay divulga tur e detaye di esey.

   Den su lectura di awe Diahuebs, drs. Raymundo Dijkhoff lo duna informacion di e desaroyo di añanan 1940 te cu aworaki na Aruba di tur loke a ser haci cada decada, kico a wordo haya, con e maneho a ser haci, y con e desaroyo ta te cu awor.  Asina esnan presente lo haya full un bista di e rikeza increible cu Aruba tin den e parti aki.  Pero ta dificil pa trece afo, como cu no tin e cuadro legal pa proteccion.

   Un persona cu semper ta adora su cultura y identidad, tin di percura tambe pa vigila y sigui e historia di bo pais.  Y arqueologonan ta investiga e restonan di e cultura material di pasado.  Esey kiermeen cu ta haci esey riba tera y den awa, y na final semper e ta beneficioso pa bo pais, pa asina enriquece conocemento.  E ta enriquece informacion di cultura, pa bo compronde kico a socede den pasado, y cu bo por adapta pa use den futuro.

   Loke ta fenomenal ta cu tur esaki ta ponebo haya informacion, cu ademas cu Aruba mes ta 90 pa 95 miyon aña bieu geologicamente, y cu tin rasa di ser humano cu ta 1.500 aña prome cu Cristo na Aruba, cu ta bay haya sa awor kico tur a wordo haci den nos awanan, cu ta bay duna un empuhe aun mas grandi di nos conocemento di e pasado di e isla, y cu ta bay engrandece cultura.  Por hasta usa e beneficio di esaki, via di legislacion, pa e bira un promocion turistico-economico tambe.

   Invitacion pa esnan interesa:  Segun drs. Raymundo Dijkhoff, esnan cu sigur lo bay haya e informacionnan aki fascinante, lo ta esnan cu ta interesa den e topico.   Tambe e ta spera di ricibi hendenan cu tin di haber cu actividad of interes aquatico.  Aki ta pensa riba e buceadornan, e piscadornan, y tur compania cu ta haci actividad economico riba awa, departamentonan concerni manera Directie Scheepvaart, Fundacion Parke Nacional Aruba, Ministerio di Cultura, sigur lo mester ta presente na e lectura aki.

   “En general mi ta invita tur hende, pasobra mi ta sigurabo cu boso ta bay mira algo cu boso no tabata sa, y cu hunto nos ta desea pa cuminza desaroya y preserva,” drs. Dijkhoff a bisa.

   E lectura lo ta den Auditorio di Museo Arqueologico, awe Diahuebs 15 di September 2022 for di 7:30 pm te cu 9:00 pm.  Ta pidi pa drenta via e porta di hardin den Emanstraat, y e lectura ta gratis.

NewsAmericasNow.com