Pa 2023 e maneho di Gobierno ta pa yega na finansa publico duradero y responsable

Black Immigrant Daily News

Ministro Maduro citando loke Gobernador a trece dilanti

ORANJESTAD (AAN): Riba Diamars durante apertura di Aña Parlamentario y manera ta un tradicion e dia aki Gobernador di Aruba ta tene su discurso caminda e ta trece dilanti e maneho di Gobierno pa e siguiente Aña Parlamentario.

   Gobernador di Aruba durante su discurso a trece dilanti cu den bida bo ta hayabo ta confronta temponan bon y duro, pero entre e temponan aki nos ta haya oportunidad pa bira mas fuerte y alavez humilde como ser humano.

   Ultimo añanan Aruba a keda confronta cu temponan duro, cu a marca nos isla y nos comunidad, lagando lesnan importante pa futuro desaroyo di nos Pais, pero nos Pais Aruba ta determina pa lanta back y sigui lucha pa bienestar di un y tur.

   Finansa Publico Duradero y Responsabel: E maneho di Gobierno ta pa yega na finansa publico duradero y responsable. Un di e obhetivonan ta pa reduci debe y gastonan di interes di acuerdo cu normanan internacional manera recomenda pa e Fondo Monetario Internacional y palabracion haci cu Hulanda na 2018.

   Aruba a sali di e tempo duro cu e virus di Covid-19 a hinca nos pais aden, cu yudansa, pero nos situacion ta keda delicado. Nos economia, sosteni pa e actividad principal – cu ta nos turismo – ta mustrando señalnan di un recuperacion fuerte. E efectonan riba e.o. finansa publico lo tin su impacto pa hopi aña ainda. Lo tuma su tempo pa yega atrobe na resultadonan presupuestario confortante. Y e heridanan cu e pandemia a ocasiona den cada hogar aki na Aruba, ainda no a cura completamente.

   Presupuesto 2023: Pa 2023, a logra reduci diferente gasto y aumenta entradanan di Pais door di pone enfasis riba e.o. cumplimento di impuesto. E gastonan di interes di nos debenan sinembargo ainda ta un peso grandi riba nos finansa publico.

   E palabracionnan haci cu Hulanda den cuadro di sosten di likides durante 2020, ta den pleno ehecucion atraves di e paketenan di reforma pa asina cumpli cu e acuerdonan haci recientemente cu Hulanda. Departamentonan di Gobierno ta trahando diligentemente riba mas di 60 punto di accion, cu ta canando riba 8 diferente area di maneho.

   Pa mayoria di e proyectonan ya caba tabatin plannan di ehecucion traha den cuadro di e masterplan traha pa profesionalnan: Reposicionando Rumbo di nos Pais. Den e Presupuesto 2023 tin 12,5 miyon Florin destina pa implementacion di proyectonan aki.

   Paketenan di Reforma: Despues di a haci hopi investigacion y estudio Gobierno lo cuminsa awor cu ehecucion di e paketenan di reforma. Meta ta pa crea un base economico mas solido cu lo permiti nos recupera mas liher den caso cu nos experiencia contratiempo economico.

   Den e cuadro aki y den dialogo cu Hulanda lo sigui enfoca den e periodo nos dilanti riba e plannan pa fortifica nos economia, finansa publico, organizacion di gobierno, cuido di salud, enseñansa y estado di derecho.

   Na final di su discurso, Gobernador a enfatisa cu pa nos pais recupera por completo economicamente, financieramente y socialmente, ta esencial pa nos tin union, solidaridad y respet pa cu e causa. Gobierno mester demostra disciplina financiero; inversion priva y publico mester worde motiva; y accionnan concreto mester tuma lugar den conhunto y dialogo cu gruponan di interes pa drecha e bienestar di e pueblo. Asina so nos lo logra e recuperacion completo di nos Pais.

   Minister di Finansa y Cultura Xiomara Maduro ta mira e aña parlamentario como un reto cu perspectiva y nos pais hunto cu su profesionalnan ta trahando duro na un forma responsabel pa recuperacion di nos pais y yega un finansa publico duradero. Alavez e mandatario ta desea Parlamento hopi sabiduria y energia positivo pa conhuntamente cu gobierno traha na progreso di nos pais Aruba.

NewsAmericasNow.com